Prezidente Parlamentu Nasionál, Maria Fernanda Lay, realiza enkontru ho Ministra Finansas, Santina José Rodrigues F. Viegas Cardoso, iha loron 27 fulan abril tinan 2026, iha Gabinete Prezidente Parlamentu Nasionál nian.

Iha enkontru ne'e, Ministra Finansas, Sra. Santina José Rodrigues F. Viegas Cardoso, hato'o atualizaçaun kona-ba relatóriu Auditoria, tuir Rezolusãun Parlamentu Nasionál ne'ebé husu atu halo auditoria ba Tribunais. Ministra Finansas hateten katak Ministériu Finansas hala'o ona prosesu aprovisionamentu no relatóriu auditoria ne'e konkluidu tiha ona.

Liu husi reuniaun ne'e, Ministra Finansas husu mós PPN atu fó feedback ruma. Em prinsípiu, PPN konkorda katak relatóriu auditoria ba Tribunais ba tinan 2018–2019 no tinan 2020 konkluidu tiha ona, no bele fó ona ba Tribunais. Tribunais mós fó ona resposta (feedback) kona-ba relatóriu ne'e.

Iha oportunidade ne'e mós, Ministra Finansas informa kona-ba servisu atuál ne'ebé Governu hala'o hela, liuliu preparasaun ba Orsámentu Retifikativu 2026. Tuir informasaun ne'ebé fó sai, agora dadaun Ministériu Finansas prepara hela dokumentasaun sira, inklui lei ne'ebé sei lori mai Parlamentu, possivelmente iha fulan maiu, depois Senhor Primeiru-Ministru fila husi nia vizita iha estranjeiru.

PPN husu Ministra Finansas atu kontinua haree no mantein disiplina fiskál, liuliu iha área Orsãmentu Jerál do Estadu no Orsãmentu Retifikativu 2026. FIM