Ezekusaun OJE no prestasaun kontas
Relatóriu Ezekusaun Orsamentál
Relatóriu ezekusaun orsamentál, kona-ba tinan fiskál liu ba, Governu apresenta ba Parlamentu iha fulan tolu tuir mai depois tinan respetivu remata.
Depois relatóriu admite ona, distribui ba bankada parlamentár hotu-hotu no ba deputadu hotu-hotu, no mós ba komisaun espesializadu permanente hotu-hotu, atu bele halo apresiasaun.
Komisaun espesializadu permanente sira mak responsavel atu halo parecer ho fundamentu kona-ba relatóriu ezekusaun, ne'ebé iha prazu loron 15 haruka ba Komisaun Finansas Públika. Hanesan iha prosesu apresiasaun ba inisiativa lejizlativa sira seluk, komisaun sira bele konvida membru Governu atu partisipa iha reuniaun sira.
Komisaun Finansas Públika, husi nia parte, halo Parecer final kona-ba relatóriu iha prazu loron 10.
Depois simu relatóriu no parecer husi Komisaun Finansas Públika, Prezidente Parlamentu, hafoin rona Konferénsia Reprezentante Bankada Parlamentár sira, agenda debate ida ne'ebé sei la iha períodu antes ordem-du-dia no sei iha durasaun maximu loron tolu.
Debate loke no taka ho intervensaun husi Governu. Antes debate remata, bankada parlamentár sira bele halo intervensaun final, ne'ebé nia durasaun sei defini husi Konferénsia Reprezentante Bankada Parlamentár sira.
Konta Jeral Estadu
Parlamentu Nasionál mak responsavel atu fiskaliza ezekusaun orsamentál husi Estadu no delibera kona-ba Planu no Orsamentu Estadu no relatóriu ezekusaun respetivu, tuir alínea d) no e) husi númeru 3 Artigu 95.º husi Konstituisaun Repúblika Demokrátika Timor-Leste.
Tribunál Superiór Administrativu, Fiskál no Kontas (agora ne'e halo husi Tribunál Rekursu) apresenta ba Parlamentu Parecer kona-ba Konta Jeral Estadu, iha laran fulan sanulu tuir mai depois tinan ekonómiku ne'ebé refere remata.
Depois Konta Jeral Estadu admite ona, Prezidente haruka atu distribui kedas ba bankada parlamentár hotu-hotu, no mós ba Deputadu sira ne'ebé husu.
Konta Jeral Estadu haruka mós ba Komisaun Finansas Públika, ne'ebé halo Parecer ho fundamentu no Rekomendasaun sira kona-ba Konta Jeral Estadu, se presiza, iha prazu loron 30, no haruka sira ba Prezidente Parlamentu Nasionál.
Prezidente Parlamentu, hafoin rona Konferénsia Reprezentante Bankada Parlamentár sira, agenda debate parlamentár ida ho durasaun maximu loron ida.
Debate loke husi partidu opozisaun boot liu no taka ho intervensaun husi Governu.
Antes debate remata, bankada parlamentár sira bele halo intervensaun final, ne'ebé nia durasaun sei defini husi Konferénsia Reprezentante Bankada Parlamentár sira.
