Parlamentu Nasional iha órgaun jestaun rua: Prezidente Parlamentu Nasional no Konsellu Administrasaun (Artigu 6 husi LOFAP – Lei Organizasaun no Funsionamentu Administrasaun Parlamentar, Lei nu. 12/2017, loron 24 fulan-Maiu).

Prezidente Parlamentu Nasional:

Prezidente Parlamentu Nasional iha autoridade ba funsionáriu, ajente no forsa seguransa hotu-hotu ne'ebé serve iha Parlamentu (Artigu 14 husi Rejimentu Parlamentu Nasional nian). Prezidente Parlamentu Nasional mós Prezidente Konsellu Administrasaun nian.

Konsellu Administrasaun:

Konsellu Administrasaun Parlamentu Nasional nian mak órgaun jestaun ba asuntu administrativu, finanseiru, patrimoniál, organizasaun servisu parlamentár, rekursu umanu no seguransa Parlamentu Nasional nian.

Komposisaun no direitu votu

Konsellu Administrasaun kompostu husi membru sira tuir mai (artigu 11 husi LOFAP):

●       Prezidente Parlamentu, ne'ebé prezide, no votu de'it hodi dezempata;

●       Deputadu lima, reprezentante husi bankada parlamentár boot liu lima nian;

●       Reprezentante ida husi funsionáriu Parlamentu nian, la iha direitu votu;

●       Sekretáriu-Jerál Parlamentu Nasional nian, la iha direitu votu.

Kompeténsia sira

Konsellu Administrasaun mak iha kompeténsia atu deside kona-ba asuntu polítika jerál jestaun Parlamentu Nasional nian hotu-hotu no meius finanseiru, umanu no materiál ne'ebé presiza ba nia ezekusaun (artigu 9 husi LOFAP). Tan ne'e, Konsellu Administrasaun mak órgaun ne'ebé fornese orientasaun estratéjiku no define prioridade sira. Mikru-jestaun ka jestaun operasionál sai responsabilidade husi korpu funsionáriu profisionál sira ne'ebé integra Servisu Parlamentár, dirijidu husi Sekretáriu-Jerál, ne'ebé sob kontrolu no submete kontas ba Konsellu Administrasaun.

Entre kompeténsia prinsipál sira mak hanesan tuir mai:

●       Fó opiniaun ka aprezenta proposta kona-ba asuntu hotu-hotu ne'ebé tenke submete ba Plenáriu atu delibera, tuir lei ida-ne'e;

●       Aprova proposta orsamentu Parlamentu Nasional nian ne'ebé aprezenta husi Sekretáriu-Jerál;

●       Aprova planu no regulamentu seguransa Parlamentu Nasional nian no observa nia ezekusaun;

●       Aprova regulamentu kona-ba kompeténsia espesífiku husi diresaun no divizaun Sekretariadu Parlamentu Nasional nian, no fó opiniaun kona-ba regulamentu internu Sekretariadu-Jerál nian;

●       Aprecia relatóriu ezekusaun orsamentál no jestaun finanseira ne'ebé aprezenta husi Sekretáriu-Jerál;

●       Simu no aprecia relatóriu anuál Sekretariadu-Jerál nian, ne'ebé aprezenta husi Sekretáriu-Jerál;

●       Konsellu Administrasaun prepara no aprezenta ba Plenáriu relatóriu anuál kona-ba ninia atividade sira.

Funsionamentu

REUNIAUN: Konsellu halo reuniaun ordinária dala ida kada fulan. Bele mós halo reuniaun ekstraordinária. Reuniaun ekstraordinária bele hetan husi maioria membru Konsellu nian, liu husi karta ida ba Prezidente Konsellu Administrasaun (nu. 1 artigu 10 husi LOFAP). Reuniaun hotu-hotu iha ata, ne'ebé publika iha jornál ofisiál Parlamentu Nasional nian (Regulamentu Konsellu Administrasaun, artigu 9).

KUÓRUM FUNSIONAMENTU NO DELIBERASAUN: Atu Konsellu bele halo reuniaun no delibera ho válidu, presiza prezensa husi Prezidente no membru sira liu husi tolu ne'ebé iha direitu votu (nu. 3 artigu 11 husi LOFAP).

SISTEMA ATRIBUISAUN NÚMERU VOTU: Sistema votu nian mak proporsionál, signifika katak reprezentante bankada ida-idak iha númeru votu proporsionál ba boot bankada partidu nian iha Parlamentu (nu. 3 artigu 10 husi LOFAP). Proporsionalidade konverte ba númeru votu exatu husi reprezentante bankada sira ne'ebé prezente.

Konsellu Administrasaun aprova iha ninia reuniaun dahuluk kada legislatura, númeru votu membru ida-idak nian. Ida-ne'e operasaun ida ne'ebé tenke halo iha kada legislatura foun.