Prezidente Parlamentu Nasionál (PPN), Maria Fernanda Lay, akompaña husi Ministru Justisa, Sérgio Hornai, Sekretáriu Jerál Parlamentu Nasionál, Edgar Sequeira Martins, no Diretora Gabinete Estudu no Asesoria Parlamentar, Casilda Ilda Afonso, realiza reuniaun ho reprezentante xefe delegasaun Estadu Membru sira husi setór Justisa Nasaun CPLP (Comunidade dos Países da Língua Portuguesa) nian. Sira ne’ebé reprezenta mak Ministra Justisa no Direitu Umanu São Tomé e Príncipe, Vera Cravid, ho nia ekipa; Diretora Jerál Polítika no Justisa, ne’ebé reprezenta Ministru Justisa Cabo Verde; no Embaixador Angola nian iha Timor-Leste, José Andrade de Lemos, ne’ebé reprezenta Angola. Reuniaun ne’e halo iha loron 26 fulan outubru tinan 2026, iha Sala Konferénsia Parlamentu Nasionál nian.

Ministru Justisa aprezenta reuniaun ne’e ba Xefe Orgaun Soberania Segundu, ho objetivu atu hetan mós hanoin husi Prezidente Parlamentu kona-ba tema konferénsia reuniaun CPLP ne’ebé Ministru Justisa Timor-Leste rasik prezide, ho tema “Kombate Fraude Online ka Scamming”. Tema ida ne’e sai preokupasaun sentrál husi Estadu Membru CPLP iha setór Justisa no mós iha mundu. Tanba ne’e importante tebes atu konsolida hanoin no fahe pratika diak sira kona-ba lejislasaun hanesan protesaun dadus, Lei Sibernétika no seguransa sibernétika, inklui rona mós hanoin kona-ba efikásia kombate fraude ida ne’e husi Estadu Membru seluk, tuir Ministru Justisa nia hatete ba jornalista sira hafoin reuniaun.

Iha reuniaun ne’e, Prezidente Parlamentu mós hato’o nia mensajen kona-ba tema refere. Nia hatete katak Intelijénsia Artifisiál (IA) agora dadaun sai preokupasaun orgaun Estadu sira no mós iha mundu, no presiza tebes atu fahe ideia ba malu kona-ba oinsá bele kombate fraude online ne’ebé afeta setór hotu-hotu. “Importante tebes atu fahe informasaun hotu husi Estadu Membru sira kona-ba oinsá bele kontribui ba ita-nia servisu tuir kontestu Estadu Membru ida-idak nian. Timor-Leste maske nasaun foun entre nasaun CPLP seluk, bele fahe mós pratika diak ne’ebé iha, maski Timor-Leste seidauk iha lejislasaun protesaun dadus no seguransa sibernétika. Tanba ne’e importante atu rona mós hanoin husi Estadu Membru CPLP seluk, ho objetivu ida diak ba povu nia bem-estar”, hatete Prezidente

Nune’e, Xefe Uma Fukun Parlamentu ne’e dezeja mós susesu ba konferénsia refere no fó prenda ba reprezentante xefe delegasaun sira, nudar símbolu amizade metin Timor-Leste ho Estadu Membru CPLP sira. Fim.