Parlamento Nasionál, iha Sesaun Plenária Ordináriu, iha loron 6 fulan-outubru tinan 2026, hala’o diskusaun no aprovasaun iha final global ba Projetu Lei (PJL) nú 18/VI(3ª) konaba Alterasaun Datoluk ba Lei nú 9/2011, loron 17 fulan agostu, aprova Orgânika Kámara Kontas Tribunal Superior Administrativu, Fiskal no Kontas, ho votus a favor 37, kontra 16 no abstensaun 1.  

Relativamente ho PJL ida ne’e, iha pedidu reabertura ida ba artigu 2.º husi Deputadu Joaquim dos Santos “Boraluli”, maibe, liu husi diskusaun no justifikasaun husi Deputadu sira, pedidu ne’e la-passa ho votu a favor 17, kontra 34 no abstensaun 3.  

Alénde ne’e, Deputadu sira aprova mós iha jeneralidade Proposta Lei (PPL) nú 29/VI(3.ª) konaba Rejime Jeral Taxa Administrativu, ho votus a favor 36, kontra 0 no abstensaun 5. Depois aprovasaun, Meza hatun hikas Proposta ne’e ba Komisaun hodi kontinua diskusaun iha especialidade. Liga ho PPL ida ne’e, iha intervensaun Vice-Ministra Finansas nian hatete:

“PPL ida ne’e mai husi necessidade atu hari kuadru jurídiku ida ne’ebé klaru, koerente, uniforme, transparente no previsível atu regula ho diak sistema kona ba taxa administrativu sira ne’ebé estadu kobra wainhira presta servisu publiku, fo lisensa ka autorizasaun, halo rejistu ka sertifikasaun, bainhira iha utilizasaun ka aproveitamentu husi bens ka servisu publiku tuir lei”.   

Antes ba diskusaun no aprovasaun ba PPL no PJL ne’e, Prezidente Parlamentu fo anúnsiu admisaun no baixa ba Komisaun B ne’ebé trata asuntu Negósiu Estranjeiru, Defeza no Seguransa Proposta Rezolusaun rua mak hanesan; Proposta Rezolusaun n.º 54/VI(4.ª) - Aprova Akordu entre Governu Repúblika Demokrátika Timor-Leste no Governu Repúblika Vanuatu kona-ba Izensaun Vistu Mútua ba Portadór Pasaporte Diplomátiku no Ofisiál ka Servisu; no Proposta Rezolusaun n.º 55/VI(4.ª) - Aprova Akordu entre Governu Repúblika Demokrátika Timor-Leste no Governu Repúblika Sosialista Vietname kona-ba Izensaun Vistu ba Portadór Pasaporte Komún;

Entretantu iha Períodu Antes Ordem do Dia, Plenáriu Aprova mós votu pezar ba falesimentu saudoso Alcino Freitas Vital “SAMODOK”, ho votus unanimidade a favor 55, kontra 0 no abstensaun 0. 

Iha biban hanesan, Komisaun C ne’ebeé trata asuntu Finansas Públikas reprezenta husi Vice-Prezidente Komisaun, Deputadu Francisco da Costa “Ikulay” akompaña husi relatora, Deputada Aliança da Conceição Araújo, aprezenta relatório vizita estudu ba Tailándia entre loron 2 to'o 8 fulan gostu tinan 2026, nune mos Komisaun G, ​​ne’ebé trata asuntu Edukasaun, Juventude, Kultura no Sidadania, representa husi Prezidente Komisaun, Deputadu Armando dos santos Lopes, no akompaña husi relator, Deputadu Mateus da Cruz de Carvalho,  aprezenta relatóriu husi misaun servisu ba Portugál entre loron, 27 to’o 30 fulan-jullu tinan 2026. Hafoin ne'e, Bankada Parlamentar sira hanesan FRETILIN no KHUNTO hato’o deklarasaun Politika, konaba servisu justisa nian no mos implementasaun taxa ne’ebé ho valor pagamentu lahanesan, situasaun sira ne’e presiza atensaun husi Governu no instituisaun relevante sira.

Sesaun Plenária ne'e, prezidi husi Prezidente Parlamentu Nasionál, Maria Fernanda Lay, akompaña husi membru Meza sira, no hetan prezensa husi Ministru Justisa, Sérgio de Jesus Fernandes da Costa Hornai, Ministru Planeamentu no Investimentu Estratéjiku, Gastão Francisco de Sousa, Vice-Ministra Finansas, Vice-Ministru Asuntu Parlamentár, Adérito Hugo da Costa. FIM