Parlamentu Nasionál, liu husi Komisaun Permanente halao reuniaun extraordinária, iha loron 21 fulan jullu tinan 2026, hodi apresia no aprova Projetu de Voto n.º 8/VI (3ª) – Voto de Solidariedade para com o Povo da Guiné Bissau e Condenação da Detenção Arbitrária do Presidente da Assembleia Nacional Popular da Guiné-Bissau, ho votus unanimidade, 15 a favor, 0 kontra, 0 abstensaun.

Projetu votu ne’e konsidera hanesan votu solidariedade ida ba povu Guiné-Bissau, no kondena detensaun arbitráriu Doutor Domingos Simões Pereira, Prezidente Asembleia Nasionál Populár Guiné-Bissau nian, ne’ebé hetan kapturasaun hafoin golpe Estadu ne'ebé akontese iha 26 novembru 2025.

Alénde ne’e, Votasaun ne’e fó hanoin hikas fali relasaun istórika entre Timor-Leste no Guiné-Bissau, ne’ebé dura husi dékada 1970 to’o Guiné-Bissau rekoñese Timor-Leste nia independénsia iha tinan 1975. Relasaun ida ne'e kontinua forte, liu husi kooperasaun sira iha area parlamentár no eleitorál durante tinan barak nia laran.

Parlamentu mós hato'o preokupasaun kona-ba persegisaun polítika ne'ebé Prezidente ne’e hasoru dezde tinan 2020, inklui proibisaun ilegál atu viajen no prosesu judisiál ne'ebé fabrikadu, no ba dizolusaun Asembleia Nasionál Populár iha dezembru 2023.

Tanba ne'e, Parlamentu Nasionál ezije liberta imediata no inkondisionál Doutor Domingos Simões Pereira, hamutuk ho prizioneiru polítiku sira seluk, no remata persegisaun polítika iha Guiné-Bissau.

Ikus liu, Parlamentu Nasionál manifesta nia solidariedade ho povu Guiné-Bissau no husu ba Asembleia Parlamentár CPLP nian atu kondena mós detensaun ne’e no deklara solidariedade inkondisionál ho parlamentu maun-alin Guiné-Bissau nian. 

Sesaun Plenária ne'e prezidi husi Prezidente Parlamentu Nasionál Interinu, Alexandrino Afonso Nunes, akompaña husi membru Meza sira, konta ho prezensa husi Vice-Ministru ba Asuntu Parlamentar, Aderito Hugo da Costa. FIM