Grupo das Mulheres Parlamentares de Timor-Leste (GMPTL) realiza reuniaun da-huluk ba mandatu legislativa da-hat nian ho agenda diskusaun no eleisaun ba estrutura Meza foun GMPTL nian ba perioudu tinan 2026-2028, iha loron 22 fulan setembru tinan 2026, iha sala reuniaun GMPTL nian.

Antes prosede ba eleisaun, Prezedente sesante GMPTL, Deputada Aliança Conceiçao de Araújo ne’ebe akompaña husi nia Vise no Sekretaria  fo tempu ba deputada sira atu hato’o komentariu no sujestaun sira ba mandatu sesante nian, nune’e iha futuru mai bele hadiak liu tan, liu-liu implementa planu  no orsamnetu sira ne’ebe mak refleta iha problema feto no labarik feto sira iha rural to’o mai nasional inklui assegura GMPTL nia ezistensia iha mundu internasional. Hafoin de sesaun de reflesaun ida ne’e, Meza sesante retira nia mandatu hodi hili hikas kandidatu foun. Eleisaun ida ne’e la’o tuir demokrasia no Rejimentu Parlamentu Nasionál hodi fo oportunidade ba Deputada ne’ebe ho idade mais velho atu lidera Meza ad’hock , nune’e fórum deside Deputada Olinda Guterres, nudar deputada mais velha iha GMPTL hodi direje Meza ba iha eleisaun refere. 

Eleisaun refere, mai ho pakote rua ho naran hanesan tuir mai: Pakote A: Deputada Aliança Conceiçao de Araújo (Prezidente), Deputada Lucia Taeki (Vise-Prezidente) no Deputada Sancha Margarida Tilman (Sekertaria) ne’ebe mak ho nia votos 6 a favor, 7 contra, 0 abstensaun. Enkuantu pakote B ho lista hanesan tuir mai: Deputada Lucia Taeki (Prezidente), Deputada Sancha Margarida Tilman (Vise-Prezidente) no Deputada Bendita Moniz Magno (Sekretaria ) ho rezultadu votos 7 a favor, 6 kontra   no 0 abstensaun. Husi rezultadu ne’ebé iha, pakote B mak passa, hodi lidera Mesa GMPTL ba periodu 2026-2028.

Hafoin ne’e, Prezidente sesante, entrega relatóriu atividade no rekomendasaun sira husi nia lideransa Meza anterior  ba Meza foun atu bele kontinua. Prezidente eleito mos iha nia intervensaun hato’o obrigadu ba fiar no responsabilidade nebe fo atribui ba sira,  GMPTL ne’e orgaun politiku kolejial nian, la iha opozisaun no Guvernu. “GMPTL la’o ho diak wainhira hetan apoiu maximu husi kolega deputada sira hotu, tamba ne’e husu atu ita hotu servisu hamutuk hodi lori GMPTL nia servisu diak liu tan iha futuru konta ho parseiru servisu sira ne’ebe mak durante ne’e GMPTL servisu  hamutuk ona” Dehan Prezidente Eleitu. FIM