Pagina Inicial»Noticia
Maun, Alin, Inan, Feton, Povu Timor-Leste tomak…
Loron 20 Maiu tinan 2019, ita selebra aniversáriu restaurasaun ita nia independénsia ba dala sanulu resin hitu (17). Mai ita tomak aproveita komemorasaun ne’e hodi halo reflesaun hodi hare ba prosesu konstrusaun ita nia estadu iha tinan 17 nia laran ne’e, no oinsá atu kontinua hametin no haburas ita nia estadu hodi hakat ba oin.
Tinan ida ne’e, kompleta tinan ida formasaun VIII Governu Konstitusionál, marka mós ba tinan rua ona dezde ita hala’o ita nia eleisaun normal iha 2017, no tinan ida eleisaun antesipada. Maski ita halo eleisaun rua iha tinan rua nia laran tuituir malu, maibé situasaun seguransa no estabilidade iha rai laran kontinua hakmatek, ida ne’e hatudu katak Povu Timor-Leste iha ona maturidade polítika ne’ebé a’as tebes.
Povu doben Timor-Leste…
Krize 2006 iha tinan sanulu resin tolu liubá, sai duni esperiénsia ba ita tomak, mezmu husi tinan 2017 to’o ohin loron ita kontinua moris hela iha impase polítika, Povu doben Timor-Leste kontinua hatudu ninia kompromisu polítika IV governu konstitusionál deklara iha tinan 2009, “Adeus Konflitu, Benvindu Dezenvolvimentu!”
Maun-alin doben sira…
Maturidade polítika ida ne’e duni maka ita tenke kontinua hatudu, tanba iha períodu tinan lima mai oin ne’e, ita nia estadu halo esforsu atu dada kadoras kampu mina rai no gas iha Greater Sunrise mai iha ita nia rain. Atu prosesu sira ne’e hotu la’o di’ak, Timor-Leste presiza mantein estabilidade, liu-liu estabilidade polítika, tanba ne’e, nu’udár Prezidente Parlamentu, ha’u husu ba povu tomak atu haketak ita nia diversidade política partidária, grupu ka individu husi ita nia interese komún ka interese nasionál, nune’e ita hotu kontribui ba prosesu dada kadoras mai Timor-Leste ne’e!
Povu Timor laran tomak mak hau hadomi…
Mai ita hotu kontinua fó liman ba malu, hamihis ita nia diversidade polítika, hametin liután ita nia unidade nasionál, kontinua garante estabilidade nasionál, hodi nune’e, ita hotu hamutuk fó kontribuisaun ba dezenvolvimentu iha ita nia rai doben Timor-Leste, hodi hametin liután ita nia nasaun, haburas liután ita nia ekonomia. Nune’e hodi atinji meta ida ne’ebé deklara antes ona “Libertamos a Pátria e Libertemos o Povo”
Parabéns ba Povu Tomak husi Tasi Feto to’o Tasi Mane, husi Jako to’o Oekusi. Viva Povu Timor Leste…!
