Pagina Inicial»Noticia
Parlamento Nacional liu hussi reunião Plenária ordinária iha loron 5 fulan novembro tinan 2018, liu hussi votação secreta hili ona Jesuína Maria Ferreira Gomes, sai Provedora dos Direitos Humanos e Justiça (PDHJ) ba mandato tinan 4 nian.
Candidato ba PDHJ ne’e hamutuk na’in 12 hanessan; Aniceto Guro Berteni Neves, Filipe Rodrigues Pereira, Florindo José Cristóvão, Henrique de Oliveira Ximenes, Horácio de Almeida, Isabel da Costa Ferreira, Jaime Xavier, Jesuína Maria Ferreira Gomes, José Luís Oliveira, José Pereira da Conceição, Nívio Leite Magalhães, no Silveiro Pinto Baptista.
Resultado eleição hatudu la iha candidato ida mak ultrapassa 50+1 nune’e candidato na’in rua hanessan Jesuína Maria Ferreira Gomes no Horácio de Almeida ne’ebé hetan votos barak concorre ba segunda ronde hodi resulta candidato Jesuína Maria Ferreira Gomes sai provedora ho 38 votos compara candidato Horácio de Almeida ho 23votos.
Iha reunião Plenária ne’e mós Deputado sira la autoriza deslocação Presidente da Republica ba Roma iha loron 17 too 26 fulan novembro tinan 2018, ho 26 votos a favor, 35 votos contra no 0 abstenções. Deputado sira mós halo votos de pesar ba vitima sira ne’ebé monu ho avião Lion Air iha Indonésia ho 55 votos a favor, 0 contra no 0 abstenções.
Alem de ne’e Presidente Grupo Mulheres Parlamentares de Timor Leste, Deputada, Lídia Norberta Martins, halo declaração política kona-ba comemoração loron Feto Nacional ba dala 43o ne’ebé celebra iha loron 3 fulan novembro tinan 2018 liu ba.
Reunião Planaria ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa sira no hetan presença hussi Ministro da Reforma Legislativa e dos Assuntos Parlamentares, Fidélis Leite Magalhães.
