Página Inicial » Órgão sira no Função ida-idak nian
Órgão sira no Função ida-idak nian
Regimento Parlamento Nacional nian no Lei Organização e funcionamento Administração Parlamentar hatuur competência Plenário nian, Presidente Parlamento Nacional nian, Mesa Parlamento nian, no mós Comissão Permanente nian no Comissão Especializada Permanente sira-nian.
Plenário
Plenário mak órgão aas liu Parlamento nian atu hola decisão. Iha Plenário mak hala’o debate parlamentar ho membro sira Governo nian, discute no vota ba lei no tratado hirak-ne’ebé haruka mai Parlamento, hola decisões ne’ebé hatudu Parlamento Nacional nia vontade política.
Nu’udar fórum ida ba discussão política, Deputados hotu-hotu iha direito atu ko’alia iha sessões plenárias, participa iha debates, apresenta reclamação ka protesto, ka hato’o declaração voto nian. Atu bele garante katak sessão sira la’o ho ordem no Deputados hotu-hotu bele exerce didi’ak sira-nia direito, Regimento estabelece tempo ba Deputado sira atu bele ko’alia.
Plenário nia reunião hala’o segunda-segunda no terça-terça, no Presidente Parlamento nian mak dirige.
Debate iha plenário nakloke ba ema hotu, tanba ne’e sé de’it bele assiste sessão sira-ne’e.
Atu Plenário bele hahú ninia serbisu, tem que iha, pelo menos, terço ida husi Deputado sira-ne’ebé iha efetividade funções, ne’e katak Deputado na’in-22.
Maibé atu delibera ka hakotu lia, Regimento exige katak tem que iha Deputado iha efetividade funções liu metade, ne’e katak liu Deputado na’in-33.
Presidente do Parlamento Nacional
Presidente do Parlamento Nacional iha honras nu’udar representante husi segundo Órgão de Soberania.
Iha caso Presidente da República mate, husik hela cargo, hetan incapacidade permanente ka impedimento temporário ruma, Presidente do Parlamento Nacional sei sai Chefe de Estado hodi hala’o knaar Presidente da República nian, to’o eleição foun.
Presidente representa Parlamento Nacional, dirige no coordena Parlamento nia serbisu no kaer autoridade ba funcionário sira no segurança. Especificamente, nia kaer knaar atu preside ba Mesa do Parlamento (link), marca no preside sessões plenárias, liu husi consulta ho represen-tante partido sira-nian iha Conferência Representantes husi Bancada Parlamentar sira (link), fixa agenda parlamentar, simu ka la simu projeto no proposta ba lei no haruka ba comissão especializada permanente sira, simu petições ne’ebé público apresenta no haruka ba comissão especializada permanente sira.
Bainhira nia la iha, ka quando iha impedimento ruma, Vice-Presidente ida mak troca Presidente do Parlamento Nacional.
Processo eleição ba Presidente do Parlamento Nacional hahú ho apresentação candidatura husi mínimo Deputado na’in-10 no máximo na’in-20. Eleição ne’e hala’o iha sessão plenária no halo ho voto secreto. Candidato ne’ebé hetan maioria absoluta husi voto Deputado sira-nian mak sai Presidente.
Eleição ba Presidente do Parlamento hala’o ba cada Legislatura. Iha IV Legislatura, 2017-2018, Aniceto Longuinhos Guterres mak Presidente Parlamento Nacional nian. Iha V Legislatura, 2018-2020, Arão Noé de Jesus da Costa Amaral. hafoin iha mudança politica iha V Legislatura ida ne'e, Plenária hili iha loron 19 fulan maio tinan 2020, Deputado Aniceto Longinhos Guterres Lopes mak sai hanessan Presidente Parlamento Nacional.
Mesa do Parlamento
Mesa Parlamento composta husi Presidente Parlamento, Vice-presidente na’in-rua, Secretário na’in-ida no Vice-secretário na’in-rua.
Mesa Parlamento nia knaar inclui, entre sira seluk, declara katak Deputado ruma lakon mandato no garante funcionamento di’ak ba serviços apoio ba Plenário no ba Comissão sira.
Vice-Presidente sira troca Presidente bainhira nia la iha, ka quando iha impedimento ruma, no hala’o função representação Parlamento nian seluseluk ne’ebé Presidente fó ba sira.
Iha reunião plenária sira-nia laran, compete ba Secretário da Mesa atu verifica presença Deputado sira-nian, organiza inscrição atu ko’alia, haree se iha quórum no regista votação sira.
Vice-Secretário da Mesa sira troca Secretário bainhira nia la iha, ka quando iha impedimento ruma.
Hanesan mós Presidente nian, eleição ba Vice-Presidente sira, Secretário no Vice-Secretário sira hala’o ba cada Legislatura.
Processo eleição hahú ho apresentação lista taka ida husi mínimo Deputado na’in-8 no máximo Deputado na’in-12. Eleição ne’e hala’o iha sessão plenária no halo ho voto secreto.
Candidato sira husi lista ne’ebé hetan maioria absoluta husi voto Deputado sira-nian mak sai eleito.
Bainhira IV Legislatura (2017-2018) hahú, Mesa do Parlamento Nacional ne’ebé eleita mak tuirmai ne’e:
iha V Legislatura (20-2017) hahú, Mesa do Parlamento Nacional ne’ebé eleita mak tuirmai ne’e:
hafoin iha mudança politica iha V Legislatura ida ne'e, Plenária halo mudança ba estrutura Mesa Parlamento Nacional nian iha loron 19 fulan maio tinan 2020, mak hanesan:
Conferência Representantes Bancada Parlamentar sira-nian
Conferência Representantes Bancada Parlamentar sira-nian composta husi Presidente do Parlamento Nacional, ne’ebé mak preside, husi representantes bancada parlamentar sira-nian no husi membro Governo ida.
Presidente do Parlamento Nacional mak convoca Conferência, nu’udar fórum importante ba discussão entre representantes husi campo político hotu-hotu ne’ebé iha cadeira iha Parlamento, particularmente kona-ba fixação agenda ba serbisu parlamentar (período molok hahú ordem do dia no ordem do dia).
Baibain Conferência halibur semana ida dala ida. Maibé Presidente do Parlamento Nacional bele convoca Conferência bainhira precisa ba Parlamento nia funcionamento regular.
Comissão Permanente Parlamento Nacional nian
Parlamento Nacional nia Comissão Permanente funciona bainhira Parlamento dissolvido, durante para serbisu entre sessões legislativas no iha caso ne’ebé prevê iha Constituição, no hola decisão ba questão sira-ne’ebé, iha período atividade baibain, plenário mak decide.
Comissão composta husi Presidente do Parlamento Nacional, ne’ebé mak preside, husi Vice-Presidente sira no Deputado sira ne’ebé partido político hotu-hotu hili, tuir sira-nia representatividade iha Parlamento.
Além de função sira seluk, compete ba Comissão Permanente atu acompanha atividade Governo nian, coordena Comissão Parlamentar sira-nia atividade, prepara abertura ba sessão plenária no convoca Parlamento bainhira precisa.
Comissão Permanente hala’o ninia knaar tuir regra ne’ebé estabelece tiha ona iha Regulamento Comissão Permanente Parlamento Nacional nian.
Comissão Especializada Permanente sira
Comissão Especializada Permanente sira harii husi Plenário iha início Legislatura ida-idak. Compete ba Mesa atu apresenta ba Plenário proposta deliberação ho indicação comissão hira mak atu harii, naran ne’ebé sei fó ba cada comissão no knaar ida-idak nian. Molok atu apresenta proposta, Mesa tem que rona Conferência Representantes Bancada Parlamentar sira-nian.
Compete mós ba Plenário, liuhosi Presidente nia proposta depois de rona Conferência, atu delibera kona-ba número Deputados ba Comissão ida-idak no nia distribuição ba bancada parlamentar oioin.
Modelo constituição ida-ne’e implica katak Comissão Especializada Permanente sira-ne’ebé iha Legislatura ida bele la hanesan iha legislatura tuir mai.
Comissão Especializada Permanente sira composto husi Deputado hirak-ne’ebé bancada parlamentar sira mak indica, tuir, conforme bele, sira-nia representação proporcional iha Parlamento. Partido sira ho voto barak liu sei iha Deputado barak liu ho cadeira iha Parlamento, nune’e sei iha mós representante barak liu iha Comissão oioin. Importante atu destaca katak fatin iha Comissão pertence ba bancada e la’ós ba Deputado individualmente.
Baibain, Deputado ida labele pertence ba liu husi Comissão ida, maibé partido sira-ne’ebé iha Deputado uitoan bele indica representante ida atu, nu’udar exceção, integra iha Comissão to’o rua.
Deputado ne’ebé indica atu integra iha Comissão ida sei lakon ninia qualidade nu'udar membro bainhira nia rasik husu, ka se nia la pertence tan ona ba bancada parlamentar ne’ebé indica nia, ka se ninia bancada parlamentar troca nia karik, ka se nia falta reunião Comissão nian dala 3, iha cada sessão legislativa, la ho justificação.
Mesa da Comissão
Aprova tiha deliberação ne’ebé determina harii Comissão Especializada Permanente sira, Comissões halibur hodi hili sira-nia Presidente, Vice-Presidente no Secretário da Comissão. Mesa Comissão sira-nian tem que garante, bainhira bele, representação proporcional husi bancada parlamentar sira iha Parlamento.
Presidente tem que conduz comissão nia serbisu no hetan assistência husi Vice-Presidente. Secretário mak responsável ba serbisu administrativo Comissão nian.
Presidente tenki konduz komisuan nia servisu nó hetan asistensia husi Vise-Prezidente. Sekretariu mak responsável ba servisu administrativu Komisaun nian.
Competência Comissão sira-nian
Comissão Especializada Permanente sira-nia função genérica atu fó apoio ba Plenário hodi hala’o knaar ne’ebé Constituição fó ba Parlamento Nacional. Sira-nia competência inclui mós analisa no investiga assunto sira ho interesse ba nação, hakerek relatório, parecer no recomendação oioin ne’ebé depois sei analisa iha Plenário.
Ba ida ne’e Comissão sira bele bolu ministros no funcionários públicos hodi fó informações, organiza audiências públicas iha ne’ebé público no representantes husi sociedade civil hetan convite atu apresenta sira-nia hanoin kona-ba assunto ruma, no mós aprecia petição hirak-ne’ebé ema apresenta ba Parlamento.
Comissão sira mós iha papel determinante iha processo legislativo, tanba compete ba sira atu discute no fó hanoin kona-ba iniciativa legislativa sira no kona-ba acordo internacional hirak-ne’ebé haruka ba Parlamento Nacional.
Hanesan mós Plenário, Comissão sira só bele halibur no foti decisão bainhira iha quórum. Iha matéria ida ne’e, Regimento determina katak, atu comissão ida bele hahú ninia serbisu, tem que presente ona mínimo Deputado na’in-3. Atu foti decisão, tem que presente ona liu metade husi Deputado sira-ne’ebé membro Comissão ne’e nian.
Comissão Eventual sira
Comissão Eventual sira harii atu hala’o serbisu específico ruma no sira sei la continua existe tan bainhira serbisu ne’e remata tiha.
Plenário maka foti decisão atu harii Comissão Eventual ruma, liuhosi iniciativa husi Bancada Parlamentar ka Deputado sira (mínimo Deputados na’in-10).
Comissões de Inquérito
Comissão de Inquérito ida nu’udar comissão eventual ida ne’ebé harii especialmente hodi avalia Governo no Administração Pública nia atuação. Avaliação ida-ne’e mak hanaran inquérito parlamentar, ne’ebé bele tau matan ba qualquer matéria ho interesse público ne’ebé relevante hodi hala’o Parlamento Nacional nia knaar. Ba assunto específico ida-idak sei harii Comissão de Inquérito ida.
Harii Comissão ne’e bele acontece tanba um terço husi Deputados iha efetividade de funções apresenta requerimento ida ba Presidente do Parlamento Nacional. Iha caso hanesan ne’e, comissão parlamentar obrigatoriamente tem que harii duni, Plenário la foti decisão kona-ba ne’e.
Nune’e mós bancada parlamentar sira, Deputado sira husi partido hirak-ne’ebé la constitui iha bancada parlamentar, comissões, no qualquer Deputado individualmente, bele requere atu harii comissão parlamentar de inquérito ida. Iha caso hanesan ne’e, requerimento tem que aprecia iha Plenário, no comissão sei harii se hetan karik aprovação husi maioria absoluta husi Deputados iha efetividade de funções.
Rona tiha Conferência Representantes Bancada Parlamentar sira-nian, compete ba Presidente do Parlamento Nacional atu fixa número membros comissão nian, ho respeito ba princípio proporcionalidade husi Deputado sira-ne’ebé compõe bancadas parlamentares.
Comissão de Inquérito tem que remata ninia serbisu iha loron 60 nia laran, no sei la existe tan liu tiha prazo ne’e.
Atu garante katak sira hala’o sira-nia knaar, comissões parlamentares de inquérito iha kbiit atu halo investigação hanesan ho autoridades justiça nian, no bele husu apoio husi polícia bainhira precisa. Sira bele convoca qualquer funcionário ka entidade pública hodi fó depoimento, ka husu ba Governo, ba órgão sira Administração Pública nian ka naran entidade privada ruma informações no documentos ne’ebé útil hodi hala’o inquérito.
Bainhira ema la mosu, lakohi fó depoimento no la cumpre ordens legítimas husi comissão parlamentar de inquérito ida ne’ebé hala’o hela nia knaar, ida-ne’e sai hanesan crime de desobediência qualificada, tuir lei penal.
Atu remata ninia serbisu, Comissão sei hakerek no apresenta relatório ida no declaração de voto husi ninia membros. Hamutuk ho relatório, comissão parlamentar de inquérito bele apresenta projeto de resolução ida ba Plenário nia apreciação.
Relatório husi Comissão Parlamentar de Inquérito ne’e sei haruka ba Plenário nia apreciação iha debate ne’ebé marca especificamente ba ida-ne’e. Iha debate ne’e, bancada parlamentar ida-idak iha minuto tolu hodi apresenta sira-nia declaração de voto.
Maibé relatório ne’e sei la hetan votação husi Plenário. Plenário bele vota de’it ba projeto de resolução ne’ebé Comissão apresenta.