Pagina Inicial»Noticia
Parlamento Nacional liu hussi reunião Plenária ordinária durante loron rua hahú iha loron 6 too 7 fulan agosto tinan 2018, halo ona aprovação ba Projeto de Resolução n.o 9/V/1a, ho votos 36 a favor, 0 contra no 1 abstenção, hodi revoga Decreto-lei n.o 3 / 2018, de 14 de março – Primeira Alteração ao Decreto-lei n.o 3 / 2015, 14 de janeiro – Aprova o Currículo Nacional de Base de Educação Pré-escolar no Projeto de Resolução n.o 10 /V/1ª, ho votos 36 a favor, 0 contra no 1 abstenção, hodi revoga Decreto-lei n.o 4/2018, 14 de março – Primeira Alteração ao Decreto – lei n.o 4/2015, de 14 de janeiro – Aprova o Currículo Nacional de Base do Primeiro e Segundo Ciclos de Ensino Básico.
Iha discussão loron dahuluk, Deputado sira questiona makas liu kona-ba mecanismo implementação lian materna iha ensino pré-escolar, currículo nacional ba ensino básico sira, ne’ebé precisa defini politica educação ida-ne’ebe claro hodi aluno sira bele apreende ho di’ak no contribui ba qualidade ensino básico iha território tomak liuliu área rural sira.
Ministra da Educação, Juventude e Desporto, Dulce de Jesus Soares, hatete Governo precisa revoga Decreto-lei rua ne’e tanba Decreto-lei anterior liu hussi projeto-piloto iha município sira hanessan Lospalos, Manatuto inclui RAEOA (Região Administrativa Especial de Oecússi Ambeno), ba implementação lian materna iha processo aprendizagem iha mudança significativo, no ajuda labarik sira hodi aprende di’ak liu tan.
Nune’e liu hussi Decreto-lei refere bele hadi’a liu tan currículo no metodologia, hodi facilita di’ak liu tan processo aprendizagem.
Masque nune’e, too debate loron daruak nian, Deputado sira liuliu bancada oposição descorda ho posição Governo nian tanba implementação lian materna iha processo aprendizagem la iha eficiência no Governo bele usa nia competência hodi altera tuir politica Governo nian, Governo rassik bele traça nia politica educação ne’ebé claro liuliu parte currículo nian oinsá hanorin lian tetun no português iha ensino básico.
Língua tetun no português ne’e rassik hanessan lian oficial nune’e, Governo iha obrigação hodi cria condição atu desenvolve lian oficial ne’e.
Ho rasão hirak ne’e, antes hakat ba votação ba projeto de resolução rua, bancada oposição FRETILIN ho PD decide la participa iha votação.
Reunião Plenária ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa sira, nomarca presença hussi Ministro da Reforma Legislativa e Assuntos Parlamentares, Fidélis Magalhães, Ministra da Educação, Juventude e Desporto, Dulce de Jesus Soares, ho nia equipa sira.
