Parlamentu Nasionál liu husi reuniaun plenária ordinária, iha loron 1 fulan marsu tinan 2025, halo diskusaun no votasaun final global ba Proposta Lei nú. 14/VI(2.ª)) – Enkuadramentu Orsamentu Jeral Estadu no Jestaun Finanseira Públika, ho votus a afavor 38, kontra 1 no abstensaun 19.
Depois aprovasaun, Ministra Finansas iha nia intervensaun hatete, lori Governu liu-liu Ministeriu Finansas nia naran, apresia ba diskusaun lei ida ne’e iha jeneralidade to’o espesialidade, no ho esklaresimentu ne’ebé iha, bele ajuda Governu no Parlamentu entende didiak lei ne’e. Governu husu nafatin atu Parlamentu akompaña, lei ida ne’e sei utiliza ba preparasaun Osamentu Jeral Estadu 2026 nian. Ministra ne’e mós sublina katak Konta Jeral Estadu 2024 ne’ebé sei submete, tenta atu preenche rekezitus hotu ne’ebé mak iha.
Alénde ne’e, Bankada Parlamentar FRETILIN hato’o deklarasaun politika kona-ba asaun partidarizasaun iha administrasaun públiku. Entretantu iha periodu intervensaun diversas nian, Deputadu sira aprezenta preokupasaun ba problema sira hanesan konstrusaun Eskola CAFE iha munisipiu Liquiçá ho munisipiu Ainaro paradu; guarda florestal iha Barigi lahetan subsidiu hahu husi tinan 2024 no laiha edifisiu ba sira; aimoruk vacina ba bebe nian iha sentru saude laiha; apotik balun fan aimoruk liu prazu; jerador iha sentru saude Glenu la-funsiona no Funsionáriu kontratadu saude nian iha fatin ne’e la-simu pagamentu; eletrisidade; estrada; valeta; ponte sira no lixu; nune’e mós asuntu importante sira seluk ne’ebé presiza atensaun husi Governu no instituisaun relevante sira.
Iha okaziaun ida ne’e, Deputadu sira hato’o parabéns ba Aniversáriu Polísia Nasionál Timor-Leste ba dala 25, nune’e mós deseja ksolok ba musulmanu sira Timor-Leste nian, iha selebra loron Idul Fitri ne’ebé marka finál Ramadan nian.
Sesaun plenária ne’ebé hahu ho exekusaun Hino Nasionál no Minutu ida hakmatek, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministra Finansas, Santina José Rodrigues F. Viegas Cardoso; Vice-Ministra das Finanças, Felícia Claudinanda Cruz Carvalho, no Vise-Ministru ba Asuntu Parlamentar, Aderito Hugo da Costa. FIM
