Parlamentu Nasionál, liu husi Komisaun C, ne’ebe trata asuntu Finansas Públika, lidera husi Prezidente Komisaun, Cedelizia Faria dos Santos, konta mos ho prezensa Deputadu sira Komisaun D, ne’ebe trata asuntu Ekonomia no Dezenvolvimentu, realiza ona diskusaun no votasaun espesialidade ba Lei nú. 14/VI(2a) – Lei Enkuadramentu Orsamentu Jeral Estadu (OJE) no Jestaun Finanseira Públika (JFP) nian. Parte Governu Reprezenta iha diskusaun husi Ministra Finansas, Santina Jose Rodrigues F. Veigas Cardoso ho nia ekipa sira. Debate ne’e realiza iha loron 19-22 fulan marsu tinan 2025, iha Salaun Institutu Nasionál Peskas no Aquakultura (INPA), iha Maubara, Munisipiu Liquiçá.
Lei ne’e ho nia original husi lei nú 2/22, loron 10 fulan fevereiru, ho nia artigu hamutuk 126o no revoga fila fali ho total númeru artigo hamutuk 90o. Husi 90o ne’e sofre alterasaun hamutuk 23o artigos. Nune’e Lei ne’e pasa ho votasaun 5 a favor, 4 kontra no 0 abstensaun.
Revogasaun no alterasaun ba artigu sira hotu ho objetivu atu hadiak nune’e bele jere ho efisiénsia no efikasia osan Estadu nian, liu-liu hare ba separasaun osamentu, funsionamentu Empreza Publiku, jestaun ba iha Fundu Seguransa Sosial sira inklui programa, ezekusaun no relatóriu final sira.
Finalidade ba diskusaun Diploma ne’e, sei aprezenta ba Plenaria hodi halo diskusaun no votasaun iha Final Global hafoin Estrutura Komisaun C no ekipa Ministeriu Finansas halo redasaun Final iha tempu badak ne’e.
Durante diskusaun ne’e, konta mos prezensa husi Prezidente Parlamentu Nasionál, Maria Fernanda Lay, ne’ebé ho nia kualidade nudar Deputada hodi fo observasaun no opiniaun iha diskusaun lei refere. FIM
