Parlamentu Nasionál liu husi Komisaun A, ne’ebe trata asuntu Konstituisionais no Justisa realiza vizita estudu komparativu ba Vietnam, iha loron 11 too 17 fulan marsu tinan 2025, lidera husi Prezidente Komisaun A, Deputadu Patrocino Fernandes dos Reis, akompaña husi Governador Banku Sentral no ekipa.
Hafoin vizita, Prezidente Komisaun A relata katak estudu komparativu ne’e hala’o hanesan parte ida husi preparasaun ba diskusaun Proposta Lei Governu nú. 10/VI/1ª - Kona-ba o Regime Jurídico das Garantias Mobiliárias, ne’ebé buka atu responde ba ema timoroan sira ne’ebé hakarak hetan asesu ba kréditu husi banku sira. Haree ba matéria nia importánsia, Governu husu ba Parlamentu atu aprova lei ne’e.
Prezidente Komisaun explika liu tan katak, Proposta Lei ne’e hanesan iniciativa foun ida ne’ebé atu implementa iha nasaun Timor-Leste no iha ligasaun ho Banku sira, ho nuné, Komisaun A deside hodi realiza estudu komparativu ba nasaun vijiñu hanesan Vietnam hodi hare ninia implementasaun ba Lei ne’ebé hanesan. Vietname hanesan nasaun ida ho ekonomia ne'ebé dezenvolvidu tebes, iha ne'ebé,lei ida ne'ebé hanesan ho ida-ne'e implementa ona ho susesu boot, hodi kria sistema ida ne'ebé ema sira bele uza sira nia propriedade hanesan garantia, nune'e asegura asesu ba kréditu ba sira nia progresu ekonómiku.
Prezidente mós fiar katak Timor-Leste iha situasaun ida ne’ebé presiza implementa sistema ne’ebé hanesan, maibé, tanba ida ne’e lejislasaun foun, presiza estuda matéria ne’e ho kle’an no koordena ho Banku Sentrál no Banku Mundiál hodi haree sistema ne’e.FIM
