Parlamentu Nasionál liu husi reuniaun plenária ordinária, iha loron 11 fulan fevereiru tinan 2025, Deputadu sira halo diskusaun no votasaun iha jeneralidade ba Proposta lei nú. 15/VI(2.ª)) – alterasaun dahuluk ba Lei nú. 1/2017, 18 Janeiru, Rejime Tranzitóriu ba Rekrutamentu Majistradu no Defensór Públiku sira ne’ebé la’ós timoroan, no alterasaun daruak ba lei n.º 9/2011, 17 agustu, ne’ebé aprova Organika Kamara Kontas Tribunal Superior Administrativu, Fiskal no Kontas nian, ho votus 38 a afavor, kontra 0 no abstensaun 14. Depois aprovasaun iha jeneralidade, Plenáriu kontinua halo votasaun ba autorizasaun diskusaun espesialidade iha komisaun, ho votus 38 a favor, 14 kontra no 1 abstensaun.
Iha intervensaun Ministru Justisa haktuir katak, Proposta Lei ne’e introdús mudansa tranzitória espesífiku balu iha rekrutamentu ba juis no defensór públiku sira ne’ebé la’ós timoroan ne’ebé sei hala’o funsaun importante tolu, mak hanesan, hametin servisu inspesaun, asesoria no mentoria nian. Objetivu prinsipál hosi lei ida-ne’e mak atu reforsa lei estruturál atuál ne’ebé sei iha lakuna ka omisaun balun, no timoroan sira, ho lei ida-ne’e, presiza mós avalia juis, prokuradór no defensór internasionál sira-nia knaar ne’ebé servisu iha instituisaun públiku estadu nian, liuliu iha setór justisa.
Antes ne’e, Bankada Parlamentar FRETILIN, hato’o deklarasaun politika relasionadu ho politika públika ba ordenamentu territoriu no laos ho eviksaun deskontroladu; no Bankada KHUNTO hato’o deklarasaun polítika ne’ebé foka ba area infreaestrutura, koordenasaun intersektorial ne’ebé trata asuntu terras no propriedade no rekomendasaun no sujestasaun sira ba Governu ne’ebé interligadu ho observasaun iha terrenu.
Entretantu iha intervensaun diversas, Deputadu sira aprezenta preokupasaun ba problema sira hanesan eletrisidade; estrada; ponte; lixu; kondisaun kampu Estadium Municipal Díli; no kestaun importante sira seluk ne’ebé precisa atensaun husi Governu no insituisaun relevenate sira.
Sesaun Plenária ne’e, Prezide husi Prezidente Parlamentu Nasionál, Maria Fernanda Lay, mas iha inisiu sesaun, iha periodu antes ordem do dia prezide husi Prezidente Parlamentu Nasionál exersisiu, Maria Terezinha da Silva Viegas, akompaña husi membru Meza sira no hetan prezensa husi Ministru Justisa, Sérgio de Jesus Fernandes da Costa Hornai, no Vise-Ministru ba Asuntu Parlamentar, Aderito Hugo da Costa. FIM
