Prezidente Parlamentu Nasionál (PPN), Maria Fernanda Lay, realiza reuniaun regular ho Prezidente Republika (PR), José Manuel Ramos Horta, iha loron 25 fulan novembru tinan 2024, iha Palasiu Prezidensial Aitarak Laran.
Reuniaun ne’e ho objetivu atu submete Dekretu Orsamentu Jeral Estadu (OJE) 2025 ba iha Prezidente Republika hodi bele iha tempo para bele estuda no ezerse nia funsaun tuir lei haruka.
Prezidente Parlamentu mos hatutan tan katak, “submisaun ne’e iha hela prazu nia laran, enkuantu Parlamentu Nasionál ezerse ona nia funsaun hodi aprova Proposta OJE 2025 nian durante diskusaun iha prazu loron 13 (sanulu resin tolu) nian laran, no konklui ona redasaun final tamba ne’e prosessualmente Dekretu ne’e Konstituisional.
Iha oportunidade ida ne’e, hatan ba Jornalista sira nia pedidu konaba mensajen Prezidente Parlamentu nia ba Aniversariu Loron Proklamasaun Independensia Timor-Leste ba dala 49˚ nian, Prezidente hato’o nia mensajen mak hanesan “Parabéns ba aumenta tinan ida ba loron Proklamasaun Independensia Timor-Leste nian, nudar timor oan mai ita hamutuk hari’i nasaun Timor-Leste hodi bele fo benefisiu ba nasaun no ba ita nia’an. Mai ita hapara violênsia hodi kontribui ba Dezenvolvimentu Nasional”. FIM
