Parlamentu Nasionál liu husi reuniau Plenária Extraordinária, iha loron 13 fulan novembru tinan 2024, kontinua halo diskusaun no aprovasaun iha espesialidade ba Proposta Orsamentu Jeral Estadu ba tinan 2025 nian.
Iha loron ida ne’e, Deputadu sira hahú ho diskusaun no aprovasaun ba osamentu Gabinete-Primeiru-Ministru ho total USD 3.884.402 dolar amerikanu, ho votus 42 a favor, 9 kontra no 12 abstensaun; depois de ne’e, kontinua ho aprovasaun osamentu ba Gabinete Vize-Primeiru-Ministru ba área ekonomika ho total USD 400.000 dolar amerikanu, aprova ho votus 42 a favor, 17 kontra no 3 abstensaun; Osamentu ba Gabinete Vize-Primeiru-Ministru ba área sosial ho total USD 1.100.000 dolar amerikanu, aprova ho votus 42 a favor, 20 kontra no 2 abstensaun; Osamentu ba Prezidénsia Konsellu Ministru ho total USD 4.956.893 dolar amerikanu, ho votus 41 a favor, 18 kontra no 2 abstensaun; osamentu ba Sekretaria Estadu Igualdade ho total USD 1.835.595, aprova ho votus 41 a favor, 18 kontra no 2 abstensaun; osamentu Sekretaria Estadu Komunikasaun Sosial ho total USD 6.038.535, aprova ho votus 41 a favor, 18 kontra no 2 abstensaun; osamentu Ministériu Koordenador Asuntu Ekonomiku ho total 4.503.490, ho votus 41 a favor, 18 kontra no 2 abstensaun; no osamentu Sekretaria Estadu Formasaun Profissional no Emprego ho total USD 8.484.935, ho votus 47 a favor, 0 kontra no, 14 abstensaun.
Antes aprovasaun, Deputadu sira halo diskusaun no votasaun ba proposta alterasaun sira, no ikus proposta sira la-aprovadu, ho nune, montante osamentu alokadu la sofre alterasaun.
Diskusaun ne’e ensera iha 18h12 no sei kontinua iha loron 14 fulan novembru tinan 2024 hodi diskute no aprova ba orsamentu Ministériu no Sekretaria Estadu seluk.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan Prezensa husi Primeiru-Ministru, Kay Rala Xanana Gusmão ho membru Governu sira. FIM
