Parlamentu Nasional liu husi reuniau Plenária Ordinária, iha loron 11 fulan novembru tinan 2024, hahú halo diskusaun no aprovasaun iha espesialidade ba Proposta Orsamentu Jeral Estadu ba tinan 2025 nian.
Iha debate ne’e, Deputadu sira hahú ho aprovasaun ba artigu 1.º kona-ba objetu no ambitu, Osamentu Jeral Estadu aprezenta previzaun osamental husi servisu no entidade setor públiku administrativu, ne’ebé kompostu husi orsamentu ba Administrasaun Sentral, Osamentu Seguransa Sosial no Osamentu Rejiaun Administrativu Espesial Oe-cusse Ambeno, ho 39 votus a favor, 0 kontra no 23 abstensaun. Iha artigu 2.º Aprovasaun ba Tabela Orsamental, inklui tabela receitas no tabela despesas nian. Ho nune’e, tabela despeza husi subsetór Administrasaun Sentrál, tuir klasifikasaun orgánika, ekonómika no estruturadu husi programa sira, aprezenta orsamentu Órgaun Estadu ida-idak nian, ne’ebé nia diskusaun no aprovasaun hahú ho orsamentu ba Prezidénsia Repúblika nian ho totál USD 10.844.151 dólar amerikanu, passa ho votus 41 a favor, 12 kontra, no 10 abstensaun; No osamentu Parlamentu Nasionál ho total USD 23.509.772 dólar amerikanu, aprova ho votus 42 a favor, 0 kontra, no 0 abstensaun.
Diskusaun ne’e ensera iha 16h53 no sei kontinua iha loron 13 fulan novembru tinan 2024 hodi diskute ba orsamentu órgaun soberanu seluk.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan Prezensa husi Primeiru-Ministru, Kay Rala Xanana Gusmão ho membru Governu sira. FIM
