Komisaun Espesializada Permanente sira iha Parlamentu Nasionál, iha loron 24 fulan outubru tinan 2024, kontinua halo audiénsia ho Ministériu no Instituisaun relevante sira kona-ba apresiasaun inicial ba Proposta Orsamentu Jeral Estadu (OJE) 2025 no mos exekusaun Orsamentu Jeral Estadu 2024 nian.
Audiénsia ba loron ida ne’e, iha parte dadeer, mak hanesan; Komisaun A ne’ebé trata asuntu Konstitusionál no Justisa, halo audiénsia ho Prokurador Jeral Repúblika no Komisaun Antikorupsaun; Komisaun B ne’ebé trata asuntu Negósius Estranjeirus, Defeza e Seguransa Nasionál, ho Polísia Nasionál Timor-Leste, no Servisu Migrasaun; Komisaun C ne’ebé trata assuntu Finansas Públikas, ho Ministru Obras Públikas no Ministériu Transporte no komunikasaun; Komisaun D ne’ebé trata asuntu Ekonomia no Dezenvolvimentu ho Ministru Komersiu no Industria; Komisaun E ne’ebé trata asuntu Infraestrutura, ho Prezidente Autoridade RAEOA no Sekretáriu Estadu ba Fundu Espesial ba Dezenvolvimentu Oe-cusse Ambeno; Komisaun F, ne’ebé trata asuntu Saúde, Seguransa Sosial no Igualdade Jéneru, ho Ministeriu Solidariedade Sosial no Inkluzaun, Institutu Nasionál Seguransa Sosial no Sentru Nasionál Rehabilitasaun, no Komisaun G ne’ebé trata asuntu Edukasaun, Juventude, Kultura e Sidadania, ho Ministru Juventude, Desportu Arte no Kultura no Sekretáriu Estadu Arte no Kultura.
Iha parte lokraik, Komisaun sira kontinua halo audiénsia ho ministério sira mak hanesan: Komisaun A, Provedoria Direitus Humanus no Justisa; Komisaun B, ho Gabinete Fronteiras Terrestre no Marítima; Komisaun C no Komisaun D ho Ministru Petróliu no Rekursu Minerais; Komisaun E ho Ministru Planeamentu no Investimentu Estratéjuku no Fundu Infraestrutura; Komisaun F ho Gabinete Apoiu ba Sosiedade Sivil; no Komisaun G, ho Sekretáriu Estadu Komunikasaun Sosial no TATOLI, Ajensia Nasionál Timor-Leste.
Audiénsia públika ne’e sei kontinua iha loron, 25 fulan outubru tinan 2024, ho Ministériu no Instituisaun relevante sira seluk. FIM
