Komisaun Espesializada Permanente sira iha Parlamentu Nasionál, iha loron 23 fulan outubru tinan 2024, halo audiénsia ho ministériu no Instituisaun relevante sira kona-ba apresiasaun inicial ba Proposta Orsamentu Jeral Estadu (OJE) 2025 no mos exekusaun Orsamentu Jeral Estadu 2024 nian.
Audiénsia ba loron ida ne’e, iha parte dadeer, mak hanesan; Komisaun A ne’ebé trata asuntu Konstitusionál no Justisa, halo audiénsia ho Ministériu Justisa, Sekretáriu Estadu Terras no Propriedade, Polisia Sientífika Investigasaun Kriminal no Defensoria Públika; Komisaun C ne’ebé trata assuntu Finansas Públikas, hamutuk ho Komisaun D ne’ebé trata asuntu Ekonomia no Dezenvolvimentu no Komisaun G ne’ebé trata asuntu Edukasaun, Juventude, Kultura e Sidadania, halo audiénsia pública konjunta ho Prezidente Autoridade RAEOA; no Komisaun E ne’ebé trata asuntu Infraestrutura, halo audiénsia ho Sekretáriu Estadu Dezenvolvimentu Rural no FEDA.
Iha parte lokraik, Komisaun A, kontinua audiénsia ho Tribunais; Komisaun B, ho Sekretáriu Estadu Protesaun Sivil no Autoridade Protesaun Sivil; Komisaun C, Komisaun D no Komisaun G, ho Ministru Planeamentu Investimentu Estratéjiku, no Fundu Infraestrutura, Komisaun E ho Ministru Obras Públikas, Vise-Ministru Obras Públikas no SEAS; no Komisaun F, ho Ministru ba Asuntu Kombatentes Libertasaun Nasionál.
Audiénsia públika ne’e sei kontinua iha loron, 24 fulan outubru tinan 2024, ho Ministériu no Instituisaun relevante sira seluk. FIM
