Komisaun Espesializada Permanente sira iha Parlamentu Nasionál, iha loron 21 fulan outubru tinan 2024, halo audiénsia ho ministériu no Instituisaun relevante sira kona-ba apresiasaun inicial ba Proposta Orsamentu Jeral Estadu (OJE) 2025 no mos exekusaun Orsamentu Jeral Estadu 2024 nian.
Audiénsia ba loron ida ne’e, iha parte dadeer, mak hanesan; Komisaun A ne’ebé trata asuntu Konstitusionál no Justisa halo audiénsia públika ho Prezidensia da Repúblika. Komisaun C ne’ebé trata assuntu Finansas Públikas hamutuk ho Komisaun D ne’ebé trata asuntu Ekonomia no Dezenvolvimentu halo audiénsia konjunta ho Vice-Primeiru-Ministru e Ministru Koordenador ba Asuntu Ekonomikus no Ministru do Turismu no Ambiénte; Komisaun E, ne’ebé trata asuntu Infraestrutura, halo audiénsia ho Ministru Transporte no Komunikasaun; no Komisaun F, ne’ebé trata asuntu Saúde, Seguransa Sosial no Igualdade Jéneru, halo audiénsia Ministru Koordenador ba Asuntu Sosial, Institutu Nasionál Kombate HIV-SIDA, Institutu Defeza Direitu Labarik, Unidade ba Misaun atu Kombate ba Stunting.
Iha parte lokraik, Komisaun A, halo audiénsia pública ho Gabinete Primeiru Ministru Komisaun B ne’ebé trata asuntu Negósius Estranjeirus, Defeza e Seguransa Nasionál, halo audiénsia ho Gabinete Fronteira Terrestre no Marítima; Komisaun C ho D, kontinua halo audiénsia ho Ministru Petróliu no Rekursu Minerais, Autoridade Nasionál Petroliu, Autoridade Nasionál Minerais, Instituto Jeosiénsia, Timor Gap E.P no Murak Rai E.P; Komisaun F kontinua audiência ho Sekretáriu Estadu Igualdade, Polisia Nasionál Timor-Leste, VPU Nasionál no Komisaun G, ne’ebé trata asuntu Edukasaun, Juventude, Kultura e Sidadania, halo audiénsia ho Institutu Nasionál Siénsia no Teknolojia no Ajénsia Nasional Akreditasaun Akadémika.
Audiénsia públika ne’e sei continua iha loron, 22 fulan outubru tinan 2024, ho Ministériu no Instituisaun relevante sira seluk.FIM
