Parlamentu Nasionál liu husi reuniaun plenária ordinária, iha loron 24 fulan setembru tinan 2024, halo diskusaun no votasaun ba Projetu Rezoluzaun Parlamentu Nasionál n.º48/VI (1.ª) – alterasaun dahuluk ba Rezolusaun Parlamentu Nasionál n.º 6/2023, 29 fulan marsu, nebe aprova kuadru pessoal Parlamentu Nasionál nian.
Kuadru pessoal Parlamentu Nasionál tuir tabela 1 husi Rezolusaun Parlamentu Nasionál n.º 6/2023, 29 marsu, ho total 168 funsionariu, ho nune’e, proposta alterasaun ne’ebé apresenta aumenta numeru ne'e ba 180 funsionáriu. Proposta ne’e aprova ho 41 votus a favor, 4 kontra no 7 abnstensaun.
Antes halo diskusaun ba Pojetu Rezolusaun ne’e, Meza hato’o informasaun konaba vizita privadu Sua Exia Prezidente Repúblika ba Prinsipadu Monáko, kansela. Além de ne’e, iha Sesaun Plenária ne’e, Bankada Parlamentar sira mos hato’o deklarasaun política, mak hanesan, Bankada KHUNTO koalia kona-ba etika iha administrasaun públika refere ba dezalojamentu forsadu iha âmbitu dezenvolvimentu; Bankada PLP, koalia kona-ba situasaun saúde ne’ebé povo Timor-Leste enfrenta no konsidera hanesan dezastre saúde públika. Alem de ne’e, aprezenta preokupasaun kona-ba kolokasaun pneu iha fatin Misa Tasi Tolu, husu Governu atu toma atensaun.
Iha parte seluk, Proposta rezolusaun sira kona-ba izensaun vistu ba Nasaun Brunei Darussalam, Tailândia no Singapura, adia ba semana oin.
Sesaun Plenária ne’e prezide husi Prezidente Parlamentu Nasionál, Maria Fernanda Lay akompaña husi Membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
