Parlamentu Nasionál liu husi reuniaun plenária estraordinária, iha loron 23 fulan setembru tinan 2024, halo diskusaun no aprovasaun ba votu n.º 11/VI (1.ª) pezar no solidariedade ba vítima insendiu iha Portugal, aprova ho unanimidade, ho votus 63 a favor, 0 kontra no 0 abstensaun, nune’e mos votu n.º 12/VI (1.ª) pezar no solidariedade ba vitima tufaun yagi, iha Vietnam, Myanmar, Tailandia, Filipinas, Laos no Xina, votu 64 a favor, 0 kontra no 0 abstensaun.
Iha intervensaun diversas, Deputadu sira aprezenta preokupasaun kona-ba problema infraestrutura básica, problema edukasaun, problema saúde, Problema prosesu ba emisaun no renovasaun passaporte no bilhete identidade ba sidadaun sira, problema distibuisaun kaizote lixu iha sidade Díli, populasaun sira ne’ebé hetan eviksaun seidauk iha indeminizasaun husi Governu, no kestaun importante sira seluk.
Iha parte período ordem do dia nian, Deputadu sira aprova ho unanimidade Projetu Rezolusaun n.º 49/VI (1ª) – aprova Orsamentu Parlamentu Nasionál ba tinan 2025, ho votus 42 a favor, 0 kontra no 0 abstensaun. Além de ne’e, plenáriu kontinua debate relativu ho matéria Inkéritu Parlamentar kona-ba “Governu nia aktu sira iha área saúde nian”.
Sesaun Plenária ne’e prezide husi Vise-Prezidente Parlamentu Nasionál, Maria terezinha da Silva Viegas, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
