Parlamentu Nasionál liu husi reuniaun plenária estraordinária, iha loron 18 fulan setembru tinan 2024, halo diskusaun no votasaun ba Projetu Rezolusaun n.º 49/VI(1.ª) – Aprova Orsamentu Parlamentu Nasionál ba tinan 2025 nian, ho votus 46 a favor, 0 kontra no 16 abstensaun.
Orsamentu ne’ebé aprova ho montante $ 23,947,310 fahe despesas ba kategoria haat mak hanesan, Salário no Vencimento (50,2) - $12 milões dólares (válor arredondado), Bens e Serviços (27,1%) – 6,5 milhões de dólares (válor arredondado), Kapital Menor (18,5%) – 4,4 milhões dólares (válor arredondado) no transferénsias (4,2%) – 1 millaun dólares (válor arredondado). Orsamentu ne’ebé aprova sei envia ba Governu hodi ajusta iha Orsamentu Jeral Estadu ba tinan 2025 nian.
Parlamentu Nasionál iha nia orsamentu ba tinan 2025, tuir nível klasifikasaun programatika bazeia ba objetivu estratéjiku haat mak hanesan, fomenta relasaun internacional no kooperasaun iha Parlamentu, garante exersisiu funsaun konstitusional, promove kultura ida nebe nakloke no transparénsia iha Parlamentu, no funsionamentu no dezenvolvimentu Institusional.
Sesaun Plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Sekretáriu-Jeral Parlamentu Nasionál, Sr. Edgar Sequeira Martins ho nia ekipa. FIM
