Parlamentu Nasionál liu husi Grupu Nasionál Timor-Leste ba Asean Parliamentarians Of Human Rights (APHR), reprezenta husi Deputada Maria Angelina Lopes Sarmento, Deputada Lidia Norberta no Eis Deputadu Antonio de Sá Benevides, partisipa iha Konferénsia Parlamentu ASEAN ba Direitos Humanus, iha loron 24-26 fulan agostu tinan 2024, iha Jakarta Indonésia.
Iha konferensia ne’e marka prezensa husi pais membru ASEAN nian no-mos Timor-Leste, Além-de konferensia, realiza mos enkontru hodi define planu estratejiku organizasaun ne’e nian, ne’ebe partisipa husi Deputada Maria Angelina Lopes Sarmento nudar membru konselleiru ba organizasaun refere. Enkontru Estretéjiku ida ne’e halao durante loron rua iha dia 25 -26 fulan agostu tinan 2024.
Parlamentu ASEAN ba Direitus Humanus halao konferensia regional kona-ba “Liberdade Relijiaun no Fiar”, nudar área temátiku ida husi organizasaun ida ne’e. Nasaun balun iha rejiaun ASEAN hasoru sirkustánsia oin-oin kona-ba diskriminasaun, violasaun no radikalismu ba relijiaun hodi desvaloriza grupu relijiaun minoria sira, ne’ebe kontribui ba violasaun ba direitus humanus hanesan direitu individu ba relijiaun no fiar, inklui direitu atu promove no proteje fiar indígena sira.
Nasaun sira balu iha ASEAN rekonhese katak fiar indígena seidauk hetan rekonhesimentu nudar relijiaun ida, tanba so bele rekonhese deit religiaun bot lima ne’ebe rekonhese iha mundo, nune’e fiar indígena ne hola parte nudar kultura laos relijiaun. Husi sorin seluk, extremismu no diskriminasaun ba komunidade musulmanu Ahmadiah ne’ebe eziste tinan atus ida (100) resin ona, maibe sei kontinua hetan diskriminasaun. Nasaun balu uza lei Sharia ema barak hetan perseguisaun, dezaparesimentu forsada, estigmatizasaun sosial, intoleransia no konservatismu relijiaun kontinua prevalece. Tanba frajilidade ida ne’e partidu politiku sira balu uza relijiaun nudar meios atu alkansa sira nia objetivu politiku no haklean liutan diskriminasaun ba relijiaun minoria sira. Iha paíz balu, relijiaun Kristaun sai mos alvu ba diskriminasaun tanba Kristaun nudar relijiaun minoria. Nune’e mos, nasaun balu depois de golpe ne’ebe akontese iha 2021, relijiaun minoria sira hetan diskriminasaun liu husi proibisaun ba hari fatin sagradu sira, bandu sira atu pratika sira nia fiar. Komunidade Rohingya hetan perseguisaun rejime militar kontinua diskrimina no bandu sira atu halao movimentu.
Tanba tendensia violénsia no diskriminasaun kontinua buras, nune’e konferensia ida ne’é, halibur hamutuk Deputadu no eis-Deputadu sira ne’ebe ho voz-ativa no hakarak promove no proteje demokrasia no direitus humanus, iha papel importante atu kontribui ba estadu ida ne’ebe demokrátiku, iha transparénsia no digno ho konfiansa,iha defeza ba prinsipiu Deklarasaun Universal Direitos Humanos nian, hamutuk buka solusaun liu husi halo Lei no Lejislasaun sira presizamente adere ba prinsipiu sira ne, iha nivel rejional buka hametin kordenasaun no haforsa rede parlamentares forte atu servisu hamutuk hodi promove no proteje direitus humanus, respeita liderdade relijiaun no fiar, hodi nune’e ASEAN bele sai komunidade ida ne’ebe Direitus Humanus sai sentru ba ASEAN nia aspirasaun politika no ekonomia.
Rezultado husi konferensia ne’e mak resulta aprovasaun Deklarasaun Jakarta kona-ba Promove no Proteje Liberdade Relijiaun no Liberdade Fiar iha Rejiaun Sudoeste Asiátiku.
