Parlamentu Nasionál liu husi reuniaun plenária extraordinária, iha loron 10 fulan jullu tinan 2024, halo diskusaun no aprovasaun ba Proposta de resolução n.º 5/VI (1.ª) – Ratifica o Protocolo que Altera o Acordo de Marraquexe que Cria a Organização Mundial do Comércio Acordo sobre Subsídio à Pesca, ho votos 57 a favor, 0 kontra no 0 abstensaun.
Iha aprezentasaun ba Rezolusaun ne’e, Vice-Primeiru-Ministru, Francisco Kalbuady Lay hatete, objetivu husi rezolusaun ne’e atu kombate impaktu negativu husi peska excessiva, peska ilegal, peska la-deklaradu no irregular. Akordu ida ne’e nudar Tratadu Organizasaun Mundial Komérsiu (OMK) ne’ebé mak dedika ba meiu ambiente nebe estabelese regras klara ba eliminasaun subsídiu sira ne’ebé mak kontribui ba peska excessiva no degradasaun ba stocks pesqueiro mundial. Timor-Leste precisa ratifica akordu ida ne’e, tanba sai hanesan oportunu hodi hadia enkuadramentu juridiku aliña ka harmoniza no prátika internacional ba sustentabilidade, haforsa jestaun husi rekursu marinhu no garanti protesaun ba tasi no jerasaun sira futuras.
Antes halo aprovasaun, Komisaun B, ne’ebé trata Asuntu Negosius Estranjeiru, Defeza no Seguransa Nasionál, apresenta relatório no pareser relasiona ho Proposta Rezolusaun refere.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi Membru Meza sira no hetan partisipasaun husi, Vice-Primeiru-Ministru , Francisco Kalbuady Lay no Ministru Justisa, Sergio de Jesus da Costa Hornai. FIM
