Parlamentu Nasionál, liu husi Komisaun A ne’ebe trata asuntu Konstitusional no Justisa, iha loron 28 fulan juñu tinan 2024, halo workshop ikus konaba sosializasaun Bens Moveis e Imoveis relasiona ho problema Disputa Rai nian, ne’ebé realiza iha Sala konferensia Cinco Estrela, Padi-Ai, Oecusse.
Workshop ne’e hetan abertura husi Prezidente Autoridade Rejiaun Administrativu Espesial Oecusse Ambeno, Rogerio Tiago de Fatima Lobato. Iha nia abertura, Prezidente hato’o benvindo ba Prezidente Komisaun A ho nia membru sira ne’ebe maka iha inisiativu diak atu hakat ba iha rai Atoni hodi fo naroman no solusaun diak liga ba problema disputa rai sira iha Oecusse durante ne’e.
Iha sesaun abertura nian, Prezidente Komisaun A, Deputadu Patrocino Fernandes dos Reis, ne’ebe akompaña husi membru komisaun A sira ne’e, hatete, Workshop Sosializasaun ba Lei numero 13/2017, konaba Bens Moveis e Imóveis inklui lei sira seluk ne’ebe liga ba rai ho propriedade sira ne’e realiza bazeia ba karta petisaun sira ne’ebe tama iha Komisaun A ne’e barak liu mak Problema Disputa Rai nian. Tamba ne’e Komisaun A mos aleim de hili RAEOA, hili mos Munisipiu Covalima no Bobonaro hodi rona hanoin husi komunidade sira, espesialmente autoridade lokal, Seguransa no Diretor husi Instituisaun relevante sira, liga ba problema Disputa Rai iha RAEOA. Nune’e Deputadu sira bele foti informasaun kredível sira ne’e hodi rezolve asuntu tuir komptensia ne’ebe mak distribui ona.
Workshop ne’e, hetan partisipsaun maximu husi Autoridade Local, Segurança, Diretores, inclui komunidade relevantes sira.
Iha atividade ne’e mos, Deputadu sira halo vizita fiskalizasaun kortezia ba iha Ministériu Públiku, Tribunal RAEOA no instalasaun edifisiu Unidade Polisia Fronteira (UPF), Oecusse – Wini, ne’ebe maka to’o agora parado hela no la-iha kontinuidade ba projetu refere, inklui direito subsidiu refeisaun ba funsionáriu alfandega destakadu iha fronteira refere ne’ebe maka tuir informasaun seidauk simu durante fulan 7 (hitu) ona. FIM
