Sekretariu Jerál Parlamentu Nasionál, Edgar Sequeira Martins, halo abertura ba workshop ne’ebe organiza husi International Republic Institute (IRI) hamutuk ho delegasaun parseria Uma Demokrasia (Delegation of House Democracy Partnership - HDP), nebe’e kompostu husi Membru Kongresu reformadu Estadus Unidus Amerika, ne’ebe lidera husi Nick Rahal, iha loron 25 to’o 26 fulan juñu tinan 2024, iha Hotel Timor.
Atividade workshop ne’e partisipa husi kargu diresaun no xefia inklui rekniku sira apoiu Deputadu sira nian no sosiedade sivil balun. Iha intervensaun Sekretáriu Jeral nian, husu atu partisipante sira konsentra no akompaña informasaun sira inklui esperensia ne’ebe partilla husi kongresu reformadu sira, hodi fasilita servisu Parlamentu Nasionál nian.
Kooperasaun ne’ebe Parlamentu Nasionál halo ho IRI durante ne’e tantu formasaun ih arai-laran no rai-liur, hatudu ona progresu barak liuliu iha setor xave sira hanesan analista orsamental, analista setorial, analista legal no sira seluk. Tanba ne’e, Sekretáriu Jeral lori Parlamentu Nasionál nia naran agradese ba IRI no husu atu kontinua kooperasaun hodi fasilita formasaun ba área hirak ne’ebe identifika importante ba dezenvolvimentu sekretariadu Parlamentu Nasionál nian.
Matéria hirak ne’ebe aprezenta husi orador sira hanesan; Nick Joe Rahall (Membru Kongresu Reformadu EUA), Erik Paulsen(Membru Kongresu Reformadu EUA) Paker Novak (Adjunto Diretor Relasaun Governu) no Kyle Green (Ofisial Programa IRI), mak hanesan; identifika no hatan ba prekupasaun sidadaun nian; Inkorpora Sidadaun nia perspetiva iha prosesu lejislativu; envolvimentu efetivu husi sidadaun sira liu husi komunikasaun estratejika; envolvimentu sidadaun inkluzivu servisu ho komunidade remotas no marginalizado; visita konstituinte sira; utiliza salaun sidade no forum seluk hodi halibur sidadaun sira nia Feedback/komentariu; knaar Organizasaun Sosiedade Sivil (OSS) nian ne’ebe reprezenta opiniaun públiku no envolvimentu OSS sira hanesan parte ida husi estratejia envolvimentu sidadaun; utiliza OSS sira nia pesquiza no rekursu ba halo lei responsivu, utiliza OSS sira nia supervisaun efetiva ezamina pos-legislativo; no diskusaun grupu entre tekniku Parlamentu Nasional no membru sosiedade sivil. FIM
