Parlamentu Nasionál, liu husi reuniaun plenária ordinária, iha loron 25 fulan juñu tinan 2024, halo apresiasaun ba relatoriu anual Provedoria Direitu Humanu no Justisa (PDHJ) ba tinan 2023 nian, ne’ebe maka apresenta husi Provedor Virgílio da Silva Guterres ho nia ekipa sira.
Iha sesaun apresiasaun ne’e, Provedor aprezenta konaba atividade ne’ebe mak realiza iha tinan 2023 ,relatoriu contas, inklui atividade semestral tinan 2024 no espetativa ba tinan 2025. Provedor mos kontinua aprezenta katak, aprezentasaun ne’e la taka dalan mos ba Deputado sira atu husu mos atividade no contas semestral iha tinan 2024.
Hafoin de aprezentasaun ne’e, Meza fo kedas oportunidade ba iha Deputadu sira atu halo apresiasaun no perguntas liga ba asuntu Direitu Humanu no Justisa iha Timor-Leste. Nune’e, Deputadu sira apresia servisu provedor ho nia ekipa sira, no husu klarifikasaun liga ba aktu governante anterior no atual nian relaciona ho violasaun ba sidadaun sira nia direitu, bazeia ba notisia, reklamasaun no realidade ne’ebe maka Deputadu sira akompaña durante ne’e iha aspetu sosial, infrastrutura no ekonomia. Tamba ne’e oinsa provedoria nia servisu hodi halo kontrolu no rezolve aktu sira ne’e inklui ezekusaun orsamentu no atividade prevensaun violasaun Direitu Humanu iha intituisaun sira relevante, Deputadu sira mos husu atu Provedoria halo servisu tuir lei hatete, ho independensia no imparsialidade bazeia ba prinsipiu Direitu Humanu no Justisa nian.
Antes, halo aprezentasaun ba relatóriu ne’e, iha periodu antes ordem do dia, iha mos deklarasaun politika husi Bankada KHUNTO, ne’ebe mak husu Governu hasa’e konesimentu joven sira nian, liu husi loke formasaun iha area edukasaun sívika liga ba iha sentidu nasionalismu no patriotizmu espiritu luta Estadu ida ne’e nian, nune’e bele muda Joven sira nia hanoin, hodi hases sira husi violasaun ba regras sira no bele tranforma joven sira ne’ebe inovativu no kontributivu ba paz, estabilidade no dezenvolvimentu iha Timor-Leste. Alén de ne’e, husu Governu atu responde problema saúde liga ba aimoruk stock mamuk no atendimento ba pasiente sira.
Iha intervensaun diversas, Deputadu sira kontinua apresenta preokupasaun kona-ba problema sistema saúde, edukasaun, infraestrutura no ekonomia ne’ebe mak persija atensaun maximu husi Governu, no mos asuntu importante sira seluk.
Reuniaun ne’e prezide husi Prezidente Parlamentu Nasionál, Maria Fernanda Lay, akompaña husi Membru Meza sira, no hetan prezensa husi, Representante Vise-Ministru ba Asuntu Parlamentar, Sekretaria Estadu Igualdade, Elvina Sousa Carvalho no Provedor Direitu Humanu no Justisa, Virgílio da Silva Guterres ho nia equipa sira. FIM
