Parlamentu Nasionál, liu husi reuniaun plenária ordinária, iha loron 24 fulan juñu tinan 2024, eleze ona Komisariu ba Komisaun Anti-Korupsaun (KAK) ba período 2024-2028, ho votos 41 a favor, 4 kontra no 0 abstensaun.
Eleisaun ne’e halo bazeia ba karta aprezentasaun husi Governu ho lista uniku, ho kandidatu Rui Pereira dos Santos. Antes halo eleisaun, Meza halo leitura ba karta refere, no tuir kedas ba votasaun sekretu husi Deputadu sira, sem prezensa husi Bankada Fretilin.
Antes halo eleisaun ba Komisáriu KAK , halo mos, votasaun final global ba iha Lei Nu.5/VI (1a) - Lei Baze ba Ensino Superior, ho votos 38 a favor, 9 kontra no 0 abstensaun. Lei ne’e aprova husi Parlamentu Nasional, hodi melhoria servisu ensinu superior nian, principalmente atu fortifika instituisaun hodi kontrola qualidade servisu intituisaun ensinu superior sira ne’ebe eziste iha Timor-Leste.
Iha parte período antes ordem do dia nian, iha mos deklarasaun politika husi Bankada Parlamentares sira, husi Bankada PLP lamenta ho Deklarasaun husi Vise- Ministru ba Asuntu Parlamentares iha Parlamentu Nasional, iha loron 10 fulan juñu tinan 2024, ne’ebe hatete katak VIII Governu Konstitusional la halo kontinuidade ba empreza sira ne’ebe nia kontratu mate no la halo pagamento ba emprezariu sira ne’ebe maka finaliza ona obra. Bankada Fretilin hato’o nia deklarasaun politika liga ba sistema saude iha Timor-Leste ne’ebe maka sai hanesan preokupasaun boot iha sosiedade nia laran. Bankada KHUNTO hato’o nia deklarasaun politika liga ba kestaun sistema saúde, edukasaun, no ekonomia iha munisipiu sira ne’ebe persija tebes apoiu husi Governu liu husi ministeriu relevante sira.
Entertantu, iha intervensaun diversas, Deputadu sira preokupasaun relasiona ho sistema saúde, aimoruk la iha, problema edukasaun nian, problema ba Ema ho Difisiensia liga ba edukasaun equitativa, problema Seguransa Sosial, ezekusaun Orsamentu Jeral Estadu ba tinan 2024 nian, inklui asuntu importante sira seluk no husu Governu liu husi ministériu relevante sira atu tau atensaun maximu no imediata ba kestaun sira ne’ebé mak apresenta.
Reuniaun plenária ne’e prezide husi Prezidente Parlamentu Nasional, Maria Fernanda Lay, akompaña husi membru Meza sira, no hetan prezensa husi Ministru Ensinu Superiór, Siénsia no Kultura, José Honório da Costa Pereira Jerónimo no representante Vise- Ministru ba Asuntu Parlamentar, Elvina Sousa Carvalho, Sekretária Estadu ba Igualdade. FIM
