Parlamentu Nasionál liu husi Komisaun A ne’ebe trata asuntu Konstitusionál no Justisa realiza workshop iha Munisípiu Covalima, iha loron 13 fulan juñu tinan 2024.
Atividade Workshop ne’ebe lidera husi Prezidente Komisaun, Deputadu Patrocino Fernandes dos Reis no akompaña husi membru sira komisaun nian ne’e ho objetivu atu sensibiliza pakote Lei Nain ba Rai ka Rejime Espesial ba Definisaun Titularidade Bein Imovel ne’ebe regula iha Lei numeru 13/2017.
Iha abertura ba atividade ne’e, Prezidente Komisaun A konfirma katak durante ne’e akontese kazu barak kona-ba rai iha teritoriu tomak.
Komisaun A rasik rekoñese simu submisaun barak liga ba problema rai nian, ne’ebe importante tebes organiza workshop ruma hodi rona direta preokupasaun, difikuldade sira no buka solusaun tuir kompetensia Parlamentu Nasionál nian.
Prezidente Autoridade Munisipiu Covalima, Francisco de Andrade, rekoñese katak durante ne’e disputa rai akontese iha munisipiu refere, ne’ebe envolve husi komunidade sira.
Iha oportunidade ne’e mós, Prezidente Autoridade relata ba Deputadu sira kona-ba akontesimentu inundasaun foin lalais ne’e, hodi fó impaktu negativu ba populasaun ba iha area refere.
Komisaun A mós aproveita workshop refere hodi halo vizita kortezia ba instituisaun Ministeriu Publiku no prizaun iha munisipiu refere.
Atividade workshop ne’e sei kontinua ba munisipiu sira seluk inklui RAEOA tuir ajenda ne’ebe Komisaun A aprova ona.
Iha loron hanesan, Komisaun C ho F mós hala’o atividade fiskalizasaun iha munisipiu refere tuir ajenda no materia kada komisaun nian. FIM
