Ohin, 15 setembro 2014, Parlamento Nacional hala’o, iha sala Plenário nian, Sessão Solene hodi Loke Terceira Sessão Legislativa iha Terceira Legislatura.
Sessão Solene inclui intervenção hussi Presidente do Parlamento Nacional, Vicente da Silva Guterres, ne’ebé dehan katak nia haksolok ho “serviço ne’ebé Parlamento hala’o durante sessão legislativa rua ikus ne’e [que] hatudu dinâmica maka’as iha atuação parlamentar.”
Presidente do Parlamento Nacional mós sublinha katak “…aumenta tiha ona relações interparlamentares ho país vizinho sira no mós ho país maun-alin sira CPLP nian…”, no nia fó-hanoin katak Parlamento Nacional consegue hetan tiha ona estatuto nu’udar membro observador iha Assembleia Interparlamentar ASEAN nian, no ida-ne’e sei fó biban ba Timor-Leste atu acompanha, ho maneira bessik liután, processo hodi tama ba ASEAN.
Ikus liu, nia sublinha intenção atu fó prioridade, iha Sessão Legislativa Datoluk “…ba aprovação ba diploma legislativo oioin ne’ebé estruturante no hanessan base ba Estado…”, inclui: pacote lei sira rai nian, revisão ba lei kona-ba pensão mensal vitalícia, processo legislativo ba aprovação projeto de lei kona-ba anticorrupção, ne’ebé mai hussi sessão legislativa foin daudaun ne’e.
Liutiha Presidente do Parlamento Nacional, ita-nia Presidente da República, Taur Matan Ruak, hakarak fahe ba público no ba povo Timor-Leste nian ninia visão kona-ba Nação nia Situação no nia hato’o katak nia haksolok ho buat ne’ebé Timor-Leste alcança tiha ona desde 2002 no nia sublinha katak “ba dala uluk iha ita-nia história, iha ona Estado de Direito iha Timor-Leste. Democracia hamossu respeito ba direitos humanos no ba ema sira-nia dignidade, ba dala uluk, iha ita-nia nação. Eleições hetan participação maka’as no cidadão sira vota iha liberdade nia laran: sira bele fó prémio ba Governo di’ak ka bele fó castigo ba Governo la di’ak. Parlamento Nacional nia ação reflete realidade ida-ne’e no mós povo no líder sira-nia opção ba democracia, tolerância e inclusão política”.
Membros Governo nian, Ex-Titulares Órgãos de Soberania nian, Representantes hussi Confissões Religiosas, Corpo Diplomático, no mós representantes hussi sociedade civil hola parte iha cerimónia ne’e.
