Parlamentu Nasionál, liu husi reuniaun plenária ordinária, iha loron 16 fulan abril tinan 2024 halo debate ho Ministeriu Edukasaun no Komisaun Funsaun Publika ho objetivu atu halo esklaresimentu konaba informasaun hotu liga ba problema professor kontratadu tinan 2023 ne’ebe mak sei sai hanesan polemika iha sosiedade nia laran.
Iha debate ne’e, Deputadu sira fo apresiasaun ba iha esforsu Ministra Edukasaun ho nia ekipa hodi halo mudansa ba iha sistema edukasaun iha Timor-Leste, bazeia ba Lei Nu. 31/2023 konaba Lei Baze ba Edukasaun nian hodi assegura qualidade eduaksaun iha Futuru. Maske nune’e, maioria husi Deputadu sira mos hato’o kestaun barak ne’ebé mak relasiona ho preokupasaun eis-profesor contratadu sira ne’ebe mak la hola parte iha konkursu teste ba professor kontratadu sira no husu atu Ministeriu Edukasaun ho Komisaun Funsau Publika bele resolve ho konsiderasaun ba iha servisu no didikasaun ne’ebe maka eis-profesor kontratdu sira halo durante ne’e sem hare ba kor politiku nian.
Antes debate refere, Deputadu sira mos halo diskusaun no aprovasaun ba relatóriu no pareser husi Komisaun F ne’ebe trata asuntu Saude, Seguransa Sosial no Igualdade Jeneru, relasiona ho pedidu prioridade urjensia ba iha Proposta Lei Nu.7 / VI (1a) konaba Alterasaun Da-toluk husi Lei Nu. 3/2006, 12 fulan abril (Estatutu Kombatentes Libertasaun Nasional nian) ho votus 42 a favor, 2 kontra no 9 abstensaun.
Além de ne’e, halo mos diskusaun no aprovasaun ba iha relatoriu no pareser husi Komisaun G, ne’ebe trata asuntu, Edukasaun, Juventude, Kultura no Sidadania, relasiona ho Pedidu Prioridade Urjensia kona-ba Proposta Lei Nu. 5 /VI (1a) -Lei ba Baze Ensinu Superior nian, ho votus 39 a favor, 8 kontra no 9 abstensaun.
Hafoin de halo aprovasaun ba iha pedidu Urjensia husi Proposta Lei rua refere, Meza fo hikas ba Komisaun atu kontinua halo diskusaun iha Jeneralidade no Espesialidade antes submete ba Plenaria atu halo diskusaun no aprovasaun iha final global.
Reuniaun ne’e prezide husi Prezidente Parlamentu Nasional, Maria Fernanda Lay, akompaña husi membru Meza sira, no hetan prezensa hosi Ministra Edukasaun, Dulce de Jesus Soares, akompaña husi Sekretariu Estadu ba Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos ho Komisariu Funsaun Publiku ba Asuntu Forsa Servisu, José Telo Soares Cristóvão, Ministru ba Asuntu Kombatente Libertasaun Nasional, Gil da Costa Monteiro “ Oan Soru”, Ministru Ensinu Superior Siénsia no Kultura, José Honório da Costa Pereira Jeronimo no Vise-Ministru ba Asuntu Parlamentar, Aderito Hugo da Costa. FIM
