Pagina Inicial»Noticia
Parlamentu Nasionál iha loron 11 fulan maiu tinan 2022, liu husi sesaun plenária halo aprovasaun ba Proposta Lei n.o 38/V(4ª) – Alterasaun dahuluk ba Lei n.o 1/2022, loron 3 fulan janeiro, Orsamentu Jeral Estadu ba tinan 2022, alterasaun daruak ba Lei n.o 8/2008, loron 30 fulan juñu, Lei Tributaria, kriasaun Fundu Kombatentes Libertasaun Nasionál, iha final global ho votus 36 a favor, 22 kontra no 5 abstensaun.
Proposta OJE Retifikativu ne’ebe Governu aprezenta hamutuk $ 1.129.857.250, hodi finansia medidas komplementar 13 hanesan;
1. Kriasaun Fundu Veteranu ho orsamentu alokadu billiaun $1.
2. Atribuisaun Pagamentu Decimo Terceiro $200 ba kada família (exeptu funsionáriu públiku sira) ho orsamentu alokadu millaun $70.
3. Uma Kbiit Laek Plus ho orsamentu alokadu millaun $25.
4. Bolsa Estudu ba Mellór Graduadu Estudante Ensinu Báziku no Sekundáriu ho orsamentu alokadu millaun $7,5.
5. Programa Mão-de-obra ba Postu millaun $7,2.
6. Revitaliza kafé no subsídiu ba kafé Laku-teen ho orsamentu alokadu millaun $6,4.
7. Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5,1.
8. Harii Sede Arte Marsiál no Rituál millaun $2,5.
9. Programa Eskola iha Uma ho orsamentu alokadu millaun $2,1.
10. Internet gratuita iha eskola sira, millaun $1,1.
11. Subsídiu akomodasaun ba PNTL no F-FDTL ho orsamentu alokadu millaun $1,9.
12. Estabelesimentu Sekretaria ba Asuntu Traballadór iha rai-liur no Komunidade Timoroan iha Diáspora $500 mil.
13. Empregu ba mellór alunu universitáriu sira $437,5 mil.
Husi montante hirak ne’e sei hetan mudansa tanba liu husi diskusaun espesialidade Deputadu sira aprezenta proposta aditamentu balun ne’ebe hetan aprovasaun.
Ho aprovasaun OJE Retifikativu ne’e, Komisaun C ne’ebe trata asuntu Finansas Públikas sei halo redasaun final antes entrega ba Gabinete Prezidente no envia ba Prezidente Repúblika liu husi dekretu Parlamentu Nasionál.
Diskusaun no aprovasaun OJE Retifikativu ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Primeiru-Ministru, Taur Matan Ruak, ho nia membru Governu sira. FIM.
