Pagina Inicial»Noticia
Sekretariadu-Jerál Parlamentu Nasionál iha fulan fevereiru to’o inisiu fulan marsu sei hala’o asaun formasaun oioin ba funsionáriu-sira. Asaun hirak ne’e implementa iha ámbitu programa kooperasaun Parlamentu Nasionál Timor-Leste ho Assembleia Repúblika Portugal 2017-2022. Formasaun hirak ne’e, hanesan kontinuasaun ba implementasaun asaun-sira iha programa kooperasaun-nian ne’ebé hahú tiha ona nia-implementasaun dezde tinan 2017.
Asaun formasaun ne’ebé sei hala’o iha fulan fevereiru, maka implementasaun ba asaun 5 no asaun 9. Asaun 5 destinadu ba funsionáriu parlamentar-sira ne’ebé haknaar-an iha servisu apoiu Plenáriu no Komisaun Parlamentar-nian, iha Diresaun Apoiu Parlamentar-nia okos. Iha asaun-ida ne’e, matéria-sira formasaun-nian sei foka liu ba funsaun-sira fiskalizasaun no kontrolu, prosesu lejizlativu komún no espesiais ho insidénsia iha prosesu apresiasaun ba ato-sira legislativa husi governu no autorizasaun legislativa. Formasaun ne’e, hahú iha loron 14 to’o 16 fulan fevereiru ho partisipante rejistu 23 funsionáriu.
Enkuantu, asaun 9 destinadu ba funsionáriu-sira Gabinete Estudu Estratéjiku no Jurídiku, servisu apoiu Komisaun Parlamentar, Divizaun Finansas, Gabinete Auditoria Interna no Divizaun Planeamentu no Motorizasaun. Matéria ba asaun-ida ne’e sei foka liu ba Fiskalizasaun Parlamentar ba Ezekusaun Orsamentu. Tuir planu asaun ne’e sei hala’o iha loron 21 to’o 23 fulan fevereiru. Total partisipante rejistradu hamutuk 20 funsionáriu. Formador ba asaun rua ne’e, mai husi tékniku-sira Assembleia Repúblika Portugal-nia.
Implementasaun ba asaun 10 sei inisia iha 2 to’ o4 fulan marsu. Programa ne’e sei apoiu dezenvolve mekanizmu kooperasaun ho governu, liuliu hodi estabelese prosedimentu rigorozu no sistemátiku ba prestasaun informasaun nesesária kona-ba atividade fiskalizasaun-nian. Asaun-ida ne’e sei destina ba funsionáriu-sira Gabinete Estudu Estratéjiku, servisu-sira apoiu Plenáriu no Komisaun parlamentar-nian. Total participante rejistradu 24 funsionáriu. Formador ba asaun ne’e kontinua husi tékniku –sira Assembleia Repúblika Portugal-nian.
Asaun hirak iha leten, hala’o ho karater virtual/online. Plataforma ne’ebé utiliza maka Microsoft teams. FIM.
