Pagina Inicial»Noticia
Parlamentu Nasionál iha loron 1 fulan dezembro tinan 2021, hahú ona halo diskusaun ba Proposta Orsamentu Jeral Estadu (OJE) 2022 nian, iha jeneralidade.
Diskusaun ne’ebe prezide husi Prezidente Parlamentu Nasionál, Aniceto Longuinhos Guterres Lopes, hahú ho ezekusaun Hino Nasionál no kontinua kedas ba leitura guiaun husi Sekretaria Meza no intervensaun husi Primeiru-Ministru, Taur Matan Ruak.
Iha intervensaun Primeiru-Ministru nian hatete Proposta OJE 2022 ne’ebe Governu aprezenta ba Parlamentu Nasionál define ona ho objetivu haat ne’ebe sei alkansa iha tinan oin mai mak hanesan; kombate pandemia ne’ebe kauza husi Covid-19, Proteje Sidadaun sira, Rekupera ekonomia no kria empregu no tinan 2022 haree hanesan tinan rekuperasaun ba pandemia Covid-19.
Proposta OJE 2022 ne’ebe Governu aprezenta hamutuk $ 1.675.000.000,00 hodi finansia atividade tomak Governu nian ne’ebe hatuur ona iha planu no programa.
Hafoin diskursu husi Primeiru-Ministru kontinua kedas ba leitura relatóriu no pareser husi Komisaun Finansas Públikas kona-ba politika alokasaun orsamentu no preokupasaun seluk Parlamentu Nasionál nian liga ba Proposta OJE.
Diskusaun ba jeneralidade ne’e sei kontinua iha loron 2 fulan dezembro hodi kontinua ba resposta husi Governu kona-ba relatóriu no pareser Komisaun C nian.
