Pagina Inicial»Noticia
Povu doben Timor-Leste ne’ebé namkari iha rai-laran no rai-li’ur!
Ohin Timor-Leste selebra tan loron independénsia ba dala 46, ne’ebé Comite Central FRETILIN (CCF) proklama iha 28 Novembru, 1975. Loron ne’ebé rejista tiha ona iha ita nia istória luta libertasaun nasionál.
Loron ida ne’e, fó hanoin mai ita hodi valoriza no rekuñese nafatin papél indispensávél ita nia luta-na’in sira, ne’ebé fó-an tomak hodi harii independénsia ida ne’e. Ita mós rekuñese no valoriza povu tomak nia partisipasaun ativa iha luta ba libertasaun no independénsia Timor-Leste.
Proklamasaun Independénsia iha 28 Novembru 1975, nu’udár atu korazozu no desizivu ida ne’ebé ita nia líderes pionerus independénsia hatudu iha tempu ne’ebá. Sira nia dedikasaun, kapasidade organizasaun no abnegasaun, iha idade joven, mezmu hasoru dezafius polítikus no ideolójikus ne’ebé bo’ot iha nivél rejionál no mundiál. Rekuñesementu no valorizasaun a’as liu ba sira mak, ita tenki fó kontinuidade, mantein nafatin espíritu sakrifisiu, abnegasaun, dedikasaun no kapasidade organizasionál ne’ebé sira hatudu ona.
Liu ona tinan 46 ita proklama independénsia no liu ona tinan 19 ita restaura ita nia independénsia, maibé ita nia fundamentu polítiku, ekonómiku, no sosiál nu’udár país independente seidauk metin. Ita nia instituisaun estadu sira mós seidauk hari´i ho metin no funsiona lolos tambá ita seidauk hametin kultura vida institusionál iha ita nia rai.
Ne’e duni, nu’udár PPN, ha’u hakarak konvida no apela nafatin ba sidadaun hotu-hotu, liu-liu joven sira, partidus polítikus, sosiedade sivíl, emprezáriu, profisíonais husi setór hotu-hotu, edukadores no formadores, servidór estadu sira hotu atu servisu maka’as nafatin ho dedikasaun tomak, ho abnegasaun, ho korájen no sakrifisiu, ho vontade organiza-an no organiza malu hodi hametin fundamentu ita nia independénsia. Partisipa nafatin iha atividades ba mantein saúde individuál no saúde públika, inklui simu vasina kontra covid-19. Timor-Leste ne’ebé saudávél, forte, dame no prospéru iha ita hotu nia responsabilidade.
Ha’u nia parabéns, a luta kontinua no saudasôes revolusionáriu ba povo tomak.
Obrigado
