Pagina Inicial»Noticia
Parlamentu Nasionál iha loron 4 fulan outubru tinan 2021, liu husi sesaun plenária aprova ona Proposta Lei no33/V(3ª) – alterasaun dahuluk ba Lei no 5/2016, loron 25 fulan maiu, ne’ebe estabelese Prosedimentu ba Konsesaun Indultu no Komutasaun Pena.
Aprovasaun ba alterasaun iha Jeneralidade ne’e ho 38 votu a favor, 16 kontra no 0 abstensaun, ne’ebe liu husi diskusaun naruk entre Deputadu sira.
Sesaun Plenaria ne’e mós halo votu pezar ba matebian Marçal Amaral Magno Guterres (Mauclao).
Iha intervensaun diversa Deputadu sira nian kontinua fó hanoin ba Governu atu rezolve preokupasaun komunidade sira nian hanesan bee-moos, estrada, eletrisidade, saúde, edukasaun no seluk tan.
Ministru Asuntu Parlamentar no Komunikasaun Sosial, Francisco Jerónimo hatete Governu kontinua rezolve preokupasaun hirak ne’e maski hasoru defikuldade barak liuliu tanba pandemia Covid-19.
Iha parte loraik, Deputadu sira mós halo aprovasaun iha jeneralidade ba Orsamentu Privativu Parlamentu Nasionál ba 2022 nian, ho 41 votu a favor, 0 kontra no 11 abstensaun.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru sira Meza nian.
