Pagina Inicial»Noticia
Parlamentu Nasionál liu husi Komisaun A ne’ebe trata asuntu Konstitusionais no Justisa, finaliza ona diskusaun iha espesialidade ba Projetu Lei no 6/V/2ª - Lei Poder Lokal no Desentralizasaun Administrativa, ho total 183 artigo.
Diskusaun ne’e la’o durante loron 4 hahú iha loron 11 to’o 13 fulan agosto tinan 2021, iha Salaun Joya Munisipiu Covalima.
Prezidente Komisaun A, Deputado Joaquim dos Santos «Boraluli», hatete durante diskusaun hahu kedas artigu dahuluk too 183, mosu opiniaun politika no teknika barak, maibé ho konsensu no entendimentu ba artigu sira ne’e bele halo aprovasaun.
Husi 183 artigu ne’e sei bele aumenta bainhira halo redasaun final tuir ideia ka diskusaun sira.
Diskusaun ne’ebe ho prezensa Ministru Administrasaun Estatal ho nia ekuipa ne’e diskute barak liu kona-ba ukun ka poder iha administrasaun lokal, kosellu munisipal no assembleia munisipal no seluk tan.
Komisaun A aseita kona-ba kompetensia ba lisensiamentu no fiskalizasaun ba asuntu komersial nian mantem iha Governu sentral, kona-ba taxa bele atribui ba Governu lokal, no asuntu sira seluk.
Bainhira lei ne’e vigor, sei haree uluk munisipiu hirak ne’ebe preparadu ona bele implementa lei refere ho nia prosesu sira hanesan eleisaun no seluk tan.
