Pagina Inicial»Noticia
Komisaun F, ne’ebe trata asuntu Saúde Seguransa Sosial no Igualdade Jéneru, halo konsultasaun publika ba Projetu Lei Protesaun Labarik no Joven iha perigu, iha loron 15 to’o 21 fulan jullu tinan 2021, hahu husi Município Díli, Liquiçá, Bobonaro no Baucau.
Prosesu konsultasaun publika ne’e lidera husi Presidente Komisaun F, Deputadu Noé da Silva Ximenes «Buka Tuir», akompaña husi membru sira komisaun nian, no hetan prezensa máximu husi entidade relevante sira mak hanesan, reprezentante husi Defensoria Publika, Prokuradoria-Jeral, Ministériu Solidariedade Sosial no Inkluzaun, Ministériu Edukasaun, Juventude no Desportu no Ministériu Saúde, konfisaun Relijioja (katóliku, Muçulmano no Protestante), Assosiasaun Profissional Edukasaun no Saúde Municipal nian, Diretur sira husi Ensino Primária, Pre-sekundária, Sekundaria, eskola Públikas no Privadas, Autoridade Lokal sira, Prezidente Munisipal sira, Administrador Munisipal no Komandante Polisia Munisipal sira hotu.
Presidente Komisaun F ba jornalista sira hatete, Audiénsia ne’e hala´o ba dala hitu ona ho entidade relevante sira, hodi rona direita sira nian opiniaun kona-ba lei refere. Audiénsia durante ne’e, entidade sira hato’o sira nia rekomendasaun bazeia ba situasaun real iha sosiedade. Iha mós rekomendasaun husi entidade sira liga ba direitu no dever Labarik sira nia hodi konsidera iha relatório Komisaun F nian no formaliza iha lei Protesaun Labarik no Joven iha perigu, hodi halo difinisaun klaru kona-ba idade labarik sira nian no difinisaun ba família, tanbá iha Timor-Leste iha familia ida, iha familia nia laran iha tan familia kiik ida, tan ida ne’e mak sai kestaun boot iha Timor-Leste, atu nune, kuandu Lei ne’e aprova no tama iha vigor labele difikulta Ministériu relevante sira iha prosesu implementasaun nian.
Ikus liu, Prezidente Komisaun F apresia ba kontribuisaun ideia no rekomendasaun husi entidade relevante sira hotu hodi bele hadia diak liu tan Lei ne’e.
Prezidente Komisaun subliña katak, Projetu Lei nº 29/V(3ª )-Lei protesaun ba labarik no foin-sae sira iha Perigu ne’e ho total Artigo 103, maibe iha posibilidade sei aumenta tan artigo balun tuir rekomendasaun nebe mak entidades sira hato’o.
