Pagina Inicial»Noticia
Komisaun A ne’ebe trata asuntu Konstitusionais no Justisa, finaliza ona alterasaun ba pakote lei eleitoral iha espesialidade.
Diskusaun ne’ebe lidera husi Prezidente Komisaun A, Deputadu Joaquim dos Santos «Boraluli» ne’e hahu iha loron 23 too 25 fulan juñu tinan 2021, iha Salaun Muki, Munisipiu Aileu ho prezensa husi Ministru Administrasaun Estatal ho nia ekipa, Komisaun Nasionál ba Eleisaun (CNE) no Servisu Tekniku ba Administrasaun Eleitoral (STAE).
Pakote Lei Eleitoral mak hanesan Proposta Lei nº 30/V(3ª) – alterasaun datoluk ba Lei nº 5/2006, 28 fulan dezembru, kona-ba Órgaun Administrasaun Eleitoral, Proposta Lei nº 31/V(3ª) – altersaun dahuluk ba Lei no 6/2016, 25 fulan maiu, Lei Resensiamentu Eleitoral no Proposta Lei no 33/V/(3ª)- alterasaun dalimak ba Lei no 7/2006, 28 fulan dezembru, Lei Eleitoral ba Prezidente Repúblika.
Lei Órgaun Administrasaun ne’e ko’alia liu kona-ba kompetensia no aktu sira iha orgaun administrasaun eleitoral nian, no Lei Resensiamentu Eleitoral ne’e ko’alia liu kona-ba teknika liuliu kona-ba dadus sira, entretantu Lei Eleitoral Prezidente Repúblika ko’alia kona-ba prosesu sira iha eleisaun prezidensial liuliu introduz sentru votasaun paralelu.
Hafoin termina diskusaun iha espesialidade ba pakote lei refere, Komisaun A iha loron 28 fulan juñu halo aprovasaun ba relatóriu no pareser no aprezenta kedas ba Plenária hodi hetan aprovasaun iha final global.
