Parlamentu Nasionál iha sesaun plenária 17 fulan maiu tinan 2021, aprova ona iha jeneralidade ba Proposta Lei n.o 29/V(3ª) – alterasaun daruak ba Lei n.o 11/2009, loron 7 fulan outubru ne’ebe aprova Divizaun Administrativa Teritóriu, ho 47 votu a favor, 0 kontra no 0 abstensaun.
Sesaun plenária ne’e mós aprova deliberasaun ba suspensaun funsaun Deputada Maria Anabela Savio, ba prosesu judisial nian, ho 50 votu a favor, 10 kontra no 1 abstensaun.
Hafoin ida-ne’e kontinua ba aprezentasaun relatóriu atividade tinan 2020 husi Komisaun Anti Korupsaun.
Iha período ordem do dia nian, Bankada FRETILIN hato’o deklarasaun politika kona-ba distribuisaun Cesta Basica iha munisipiu sira liuliu munisipiu Díli.
Grupo das Mulheres Parlamentares de Timor-Leste (GMPTL), liu husi Prezidente GMPTL, Deputada Lídia N. dos Santos Martins, hato’o deklarasaun kona-ba Loron Internasionál Família ne’ebe liga ba realidade sei akontese dezigualidade barak iha sosiedade.
Entretanto iha intervensaun diversa nian, Deputadu sira hato’o preokupasaun no sujestaun sira kona-ba distribuisaun Cesta Basica, sidadaun balun hahú hamlaha, kazu Covid-19 ne’ebe aumenta beibeik, falta atendimentu iha Hospital Nasionál Guido Valadares, no informasaun sira seluk.
Ministru Asuntu Parlamentar no Komunikasaun Sosial, Francisco Jerónimo, hatete preokupasaun hirak ne’e balun envia ona ba ministériu relevante hodi rezolve no balun hahu rezolva tuir nia urjensia.
Sesaun plenária Prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru sira no hetan prezensa husi Ministru Asuntu Parlamentar no Komunikasaun Sosial, Francisco Jerónimo.
