Pagina Inicial»Noticia
Parlamentu Nasionál liu husi sesaun plenária iha loron 10 fulan maiu tinan 2021, aprova projetu rezolusaun n.o 71/V(3ª) – Expresa rekuñesimentu ba profisionál sira liña frente ba kombate pandemia Covid-19 no recomenda ba Governu hodi foti medida sira ba prevensaun no kombate pandemia, ho 44 voto a favor, 0 kontra no 1 abstensaun. No kontinua kedas ba votasaun ba projetu rezolusaun n.º 72/V(3ª) – kona-ba realizasaun reuniaun plenária no komisaun sira iha período konfinamentu domisiliáriu, ho 35 votu a favor, 0 kontra no 10 abstensaun.
Ho aprovasaun projetu rezolusaun rua ne’e, ho prezensa Vise-Ministru Interior, António Armindo, Deputadu sira halo aprovasaun iha final global ba Projetu Lei n.o 25/V(3ª) alterasaun dahuluk ba Lei n.o 11/2017, 24 maiu (Lei Migrasaun no Azilu) ho 42 votu a favor, 0 kontra no 3 abstensaun.
Iha sesaun plenária ne’e mós Deputadu sira halo votu pezar ba falesimentu Lequi-Olo (Alamau) no Humberto Delgado Borges de Albuquerque. No kontinua kedas ba votu saudasaun ba loron mundiál Lian Português.
Hafoin ida-ne’e, Komisaun D ne’ebe trata asuntu Ekonómia no Dezenvolvimentu, aprezenta nia relatóriu fiskalizasaun ba SEFOPE, Sentru Nasionál ba Formasaun Profisionál Becora, Sentru Nasionál Empregu no Formasaun Profisionál Tibar, Sentru Nasionál Lojistika, Institutu Nasionál Bambu Tibar, Timor Gap no Autoridade Nasionál Petroleo no Minerais.
Bankada KHUNTO mós halo deklarasaun politika ne’ebe ko’alia impaktu husi serka sanitária ba komunidade sira liuliu agrikultór sira. No Bankada FRETILIN aprezenta deklarasaun politika kona-ba selebrasaun Lian Português iha loron 5 fulan maiu.
Entretantu iha intervensaun diversa nian, Deputadu sira aprezenta preokupasaun sira kona-ba folin foos aumenta iha Munisipiu Baucau, atendimentu ba pasiente sira iha sala emerjensia Hospital Nasionál Guido Valadares Díli, ekipamentu uzadu ba prevensaun Covid-19 ne’ebe bele afeta ba saúde publika, rezultadu test swab ne’ebe kleur, distribuisaun foos ba munisipiu sira, preokupasaun estudante sira iha kapital Díli, problema veteranu sira inklui preokupasaun sira seluk.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira.
