Pagina Inicial»Noticia
Parlamentu Nasionál, liu husi Sesaun Plenária ordinária, iha loron 27 fulan abril tinan 2021, Deputadu sira halo diskusaun no aprovasaun iha generalidade ba Projeto de Lei nº 25/V/3ª – Procede à Primeira Alteração à Lei nº 11/2017, de 24 de maio, Lei de Migração e Asilo, ho 48 votu a favor, 0 kontra no 5 abstensaun.
Hafoin aprovasaun iha jeneralidade ba Projetu Lei refere, Meza anunsia no entrega hikas ba Komisaun B ne’ebé trata asuntu Negosiu Estranjeiru, Defeza no Seguransa Nasionál, hodi kontinua halo diskusaun no aprovasaun iha espesialidade ho limitasaun tempu semana ida, nune’e semana oin terça-feira, sei agenda hodi halo aprovasaun final global iha plenária.
Plenáriu halo aprovasaun ba Voto Pesar nº 7/2021, Voto de pesar e solidariedade as vítimas do ciclone tropical Seroja, do terramoto registrado na ilha de Java e do naufrágio do submarino KRI nanggala 402, na Indonésia, ho 38 votu a favor, 0 kontra no 1 abstensaun.
Além de ne’e, iha mós aprezentasaun relatóriu fiskalizasaun ba munisipiu Liquiçá iha loron 24-25 fulan fevereiro tinan 2021, husi Komisaun ba Edukasaun, Juventude, Kultura, no Sidadania. Husi relatoriu refere deskreve kondisaun sira eskola nian ne’ebé mak presija hetan atensaun mak hanesan, kondisaun infraestrutura, fasilidade, prosesu aprendizajen no rekursu humanu, implementasaun kuríkulu, administrasaun no jestaun eskolar, rekrutamentu professor sira no arte kultura. Relatóriu ne’e rasik aprezenta husi Prezidente Komisaun, Deputadu António Verdial hamutuk ho Relatora Deputada Domingas dos Santos.
Iha intervensaun diversa, Deputadu sira hato’o informasaun sira hanesan, falta bee-moos ba komunidade iha Díli laran; folin ai-moruk iha apotik sira sa’e makas; falta oxigeniu iha Hóspital Nasionál Guido Valadares; Guarda Florestal nian iha Parque Nacional Nino Conis Santana seidauk hetan sira nia salariu; populasaun ne’ebe afetadu inundasaun la bele hela nafatin iha fatin refere; Estrada iha parte Lahane, Remexio no Sarlala aat, nune’e husu Governu atu tau atensaun; ai-moruk desinfeta menuz iha postu saúde sira; servisu guarda prizaun iha Munisípiu Suai halo agresaun fízika ba prizoneiru sira; nomos informasaun importante sira seluk liga ho situasaun ne’ebé populasaun no nasaun enfrenta.
Hatán ba preokupasaun sira ne’e, Ministro ba Asuntu Parlamentares no Komunikasaun, Francisco Jerónimo, hatete, iha Estadu Emerjénsia no Serka Sanitária, Governu nafatin fasilita atu sirkulasaun ekonomia lao nafatin, tanba povu presija, maibé, la bele iha aglomerasaun liu ema na’in sanulu; relasiona ho situasaun edukasaun nian, Governu rekonhese problema sira ne’e no sei resolve tuir posibilidade nomos planu 2021 nian; no informasaun seluk, Governu anota no sei enkamiña ba Ministériu relevante hodi tau atensaun. Membru Governu ne’e mós informa ba plenária katak, aban Governu sei mai husu prolongamentu ba Estadu Emerjénsia.
Iha parte lokraik, aprezentasaun informasaun anual 2020 husi Prokuradoria-Jeral Repúblika, Prokurador José da Costa Ximenes ho nia komitiva.
Sesaun plenária ne’e prezidi husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, no hetan prezensa husi Ministru ba Asuntu Parlamentar no Komunisaun, Francisco Jerónimo, Vice-Ministru Seguransa nian, António Armindo.
