Pagina Inicial»Noticia
Parlamentu Nasionál liu husi sesaun plenária iha loron 22 fulan abril tinan 2021, kontinua halo diskusaun no aprovasaun iha espesialidade ba Proposta Lei n.o 32/V(3ª) – alterasaun dahuluk ba Lei n.o 14/2020, 29 dezembru, kona-ba Orsamentu Jeral Estadu 2021 nian.
Diskusaun ba loron daruak ne’e hahu ho aprovasaun ba orsamentu Ministériu Asuntu Parlamentar no Komunikasaun Sosial, Ministériu Finansa ho nia proposta alterasaun sira.
Durante diskusaun, Deputado sira liu husi proposta alterasaun sira tau atensaun makas oinsá Governu bele iha kapasidade hodi rezolve pandemia covid-19 no dezastre natural ne’ebé akontese ho urjensia.
Husi diskusaun naruk, Deputadu sira aprova ona dotações para a tudo Governo inklui Ministériu Saúde, Ministériu Edukasaun Juventude no Desportu, Sekretária Estadu Juventude no Desportu, Ministériu Asuntu Kombatente Libertasaun Nasionál, Ministériu Obras Publikas, Ministériu Transporte no Telekomunikasaun, Ministériu Agrikultura no Peska, Ministériu Defeza, Administrasaun Munisipal sira, Fundu Covid-19, Fundu Infraestrutura, Hóspital Nasionál Guido Valadares, no Universidade Nasionál Timor Lorosa’e.
Antes ensera sesaun plenária, Prezidente Parlamentu Nasionál lori Parlamentu Nasionál nia naran hato’o sentidu kondolensia ba família matebian ne’ebe lakon vida iha sentru izolamentu Vera-Cruz.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Primeiru-Ministru, Taur Matan Ruak, ho nia membru Governu sira.
