Pagina Inicial»Noticia
Parlamentu Nasionál iha loron 20 fulan abril tinan 2021, aprova ona alterasaun dahuluk ba Orsamentu Jeral Estadu 2021 nian iha jeneralidade ho 44 voto a favor 0 Contra no 21 abstensaun.
Diskusaun no aprovasaun ne’e hahu ho abertura husi Prezidente Parlamentu Nasionál, Aniceto Longuinhos Guterres Lopes, iha oras 09:24, kontinua kedas ba leitura giaun husi Sekretária-Meza, Deputada Lídia N. dos Santos Martins.
Hafoin leitura ba giaun, tuir kedas aprezentasaun ba Proposta Lei husi Primeiru-Ministru, Taur Matan Ruak, ne’ebe informa kona-ba politika no planu husi proposta refere. Primeiru-Ministru hatete Timor-Leste enfrenta hela situasaun defisil rua hanesan Covid-19 no kalamidade publika ne’ebé akontese iha loron 4 fulan abril foin lalais ne’e, tanba ne’e Governu halo esforsu no liu husi alterasaun ne’e hodi responde ba situasaun refere.
Entretantu Komisaun C aprezenta nia relatóriu no pareser kona-ba proposta lei ne’e, hodi informa kona-ba analiza orsamental ne’ebé komisaun espesializada sira halo durante audiénsia publika ho Governu liu husi ministériu sira.
Primeiru-Ministru hatete, Governu simu rekomendasaun sira husi Komisaun C nian oinsá bele responde situasaun ne’ebe povo no nasaun enfrenta. No iha diskusaun espesialidade sei hakle’an liu tan tuir saida mak komisaun sira nota hodi bele rezolve preokupasaun sira.
Deputadu no bankada parlamentar sira mós hato’o preokupasaun sira liga ba proposta refere no realidade ne’ebe povo no nasaun enfrenta.
Liu tiha intervensaun Deputadu sira-nian, Primeiru-Ministru hatan kedas hodi promete simu preokupasaun Deputadu sira-nian no konsidera nafatin alterasaun sira bainhira Deputadu sira aprezenta.
Hafoin aprovasaun iha jeneralidade, iha loron 21 fulan abril tinan 2021 kontinua kedas diskusaun iha espesialidade.
Debate ba proposta lei n.o 32/V (3ª) – alterasaun dahuluk ba lei n.o 14/2020, 29 dezembru kona-ba Orsamentu Jeral Estadu 2021 nian ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Primeiru-Ministru, Taur Matan Ruak, ho nia membru Governu sira.
