Pagina Inicial»Noticia
Parlamentu Nasionál, liu husi sesaun plenária ordinária iha loron 6 fulan abril tinan 2021, Deputadu sira realiza Debate ho Governu kona-ba implementasaun planu vasinasaun kontra Covid-19.
Debate ne’e hetan prezensa husi Ministra Saúde, Odete Maria Freitas Belo, Vice-Ministro, Bonifácio Maucoli dos Reis nomos reprezentante husi OMS.
Ministra Saúde explika, vasinasaun ne’e universal, ba se de’it mak hela iha Timor-Leste hetan vasina no vasina ne’e gratuito.
Iha plenária ne’e, Deputadu sira halo mós minutu ida hakmatek ba masakre Liquiçá iha loron 06 fulan abril tinan 1999.
Hafoin ida-ne’e, plenária kontinua aprova Voto nº 6/V/3ª voto de pesar pelas vítima das cheias que atingiram o país, ho 45 votos a favor, 0 kontra no 0 abstensaun. Vítima husi dezastre natural ne’ebe hamosu inundasaun boot iha domingo madrugada iha Kapital Díli nomos munisípiu balun hodi halakon ema balun nia vida nomos estraga sira nia hela fatin, estraga estrada no ponte nomos infraestrutura sira seluk.
Além de ne’e, iha mós deklarasaun polítika husi Bankada Parlamentar sira hanesan; Bankada KHUNTO reprezenta husi Deputadu António Verdial kona-ba kalamidade publika ba covid-19 hodi rezulta inundasaun ne’ebé akontese iha domingo madrugada; Bankada CNRT reprezenta husi Deputadu Leandro Lobato, kona-ba preparasaun antesedensia Governu nian hodi enfrenta dezastre natural; Bankada PD reprezenta husi Deputadu Mariano Assanami Sabino, kona-ba situasaun ne’ebé povu enfrenta, no apoio nesesidade báziku nomos subsídiu ne’ebé presiza urgente fó apoiu; Bankada FRETILIN reprezenta husi Deputadu Francisco Miranda Branco, kona-ba situasaun kalamidade publika iha Timor-Leste no Bankada PLP, reprezenta Deputada Domingas dos Santos, relasiona ho kalamidade dezastre natural iha territóriu nasionál.
Iha intervensaun diversa, Deputadu sira husu atu fó prioridade apoiu ba populasaun sira ne’ebe mak afetadu husi dezastre natural, normaliza estrada no ponte sira ba munisípiu sira nomos hadi’a drenazem iha Díli laran; husu apoiu pesoal saúde sira atu hakbesik ba fatin sira, konsentrasaun populasaun afetadu husi dezastre natural hodi fó konsulta; husu apoiu husi forsa F-FDTL hodi hamoos populasaun sira nia uma ne’ebé afetadu; nomos husu atu ministériu kompetente atu haree ema ne’ebe hodi halo uma, tenki iha lisensa; no informasaun importante sira seluk ne’ebé liga ho dezastre natural nomos pandemia Covid-19.
Hatán ba preokupasaun hirak ne’e, Ministru Asuntu Parlamentar no Komunikasaun, Francisco Jerónimo hatete, Governu hato’o ona ba munisípiu sira atu foti dadus husi populasaun afetadu sira no haruka mai ministériu relevante, hodi bele fó apoiu, no ba komunidade sira ne’ebé mak lakon sira nia hela fatin, Governu buka atu normaliza, oras ne’e daudaun Governu mobiliza hela emprezáriu sira hodi normaliza fali mota, estrada no ponte hirak ne’ebe aat.
Relasiona ho situasaun estudante sira atu fila ba munisípiu, ministériu kompetente sira dedide no entrega ona ba Servisu Integradu Jestaun Krize hodi resolve, no estudante sira sei rejista iha sira nia universidade, hafoin hetan swab husi pessoal saúde mak bele halo viajen; kestaun sira seluk, Governu rejistu no sei haruka ba ministériu kompetente hodi fó solusaun iha tempu badak.
Iha parte lokraik, Deputadu sira kontinua halo votasaun ba pedidu prioridade no urjensia ba Proposta Lei nº 32/V (3ª) - Primeira alteração à lei nº 14/2020, de 29 de dezembro, sobre o Orçamento Geral do Estado para 2021.
Pedidu urjensia ne’e, atu responde lalais efeitu negativu husi pandemia covid-19 nomos kalamidade ne’ebé mak Estadu enfrenta.
Liu husi diskusaun naruk, ikus mai Deputadu sira aprova pedidu prioridade no urjensia ba proposta lei ne’e ho 39 voto a favor, 0 contra, 14 abstensaun no la-vota ida. Ho aprovação ida-ne’e, Komisaun C prepara kalendáriu hodi define loron ba audiensia publika nomos debate no aprova Proposta Lei refere hodi submete ba plenária atu aprova. Ikus liu, Presidente Parlamentu Nasionál anunsiu katak debate ne’e tarde liu loron 28 fulan abril tinan 2021, loron ikus redasaun final, no nia detallu sei deside iha reuniaun lider bankada sira iha kinta-feira semana ne’e.
Sesaun plenária ne’e prezide Prezidente Parlamentu Nasionál, Aniceto Longuinhos Guterres Lopes, akompanha husi membru Meza sira, no hetan prezensa husi Ministru Asuntu Parlamentar no Komunikasaun, Francisco Jerónimo, Ministra Saúde, Odete Maria Freitas Belo,Vice-Ministru Saúde, Bonifácio Maucoli dos Reis, hamutuk ho reprezentante OMS, Ministru Finanças, Rui Augusto Gomes ho nia komitiva.
