Pagina Inicial»Noticia
Parlamento Nacional liu hussi Sessão Plenária extraordinária, iha loron 30 fulan dezembro tinan 2020, autoriza Presidente da República, Francisco Guterres «Lu-Olo», hodi decreta Estado Emergência ba dala 9º hahú iha loron 3 fulan janeiro 00:00 horas too loron 1 fulan fevereiro tinan 2021 23:59 horas.
Discussão ba renovação Estado Emergência ne’e hahú ho leitura guião no contínua kedas ba leitura ba mensagem hussi Presidente da República kona-ba renovação Estado Emergência refere.
Hussi mensagem ne’e, além de ko’alia kona-ba rasão seluk atu Estado contínua implementa Estado Emergência, ko’alia liu kona-ba numero caso infeção SARS-CoV-2 iha nação vizinho ne’ebé contínua aumenta, liuliu iha República Indonésia nomos iha Timor Leste rassik.
Alem de ne’e, acontece mós vírus corona foun ne’ebe mossu ona iha nação balun, nune’e Governo precisa iha condição suficiente hodi previne moras refere.
Tanba ne’e importante tebes Estado Timor-Leste continua implementa Estado Emergência nune’e Governo bele controla no previne di’ak liu tan moras refere.
Entretanto medida sira iha alteração compara ho estado emergência anterior, liuliu limita ema atu halibur malu, no seluk tan no contínua concentra makas liu iha área fronteira sira liuliu fronteira terrestre.
Deputado sira contínua hussu ba Governo atu halo controlo máximo ba fronteira hodi previne movimento ilegal, no hussu Ministério Saúde atu continua socializa no halo prevenção ne’ebé máximo iha território tomak.
Liu hussi discussão naruk. Deputado sira liu hussi votação nominal ho 46 a favor, 0 contra no 5 abstenções. Nune’e autoriza Chefe Estado hodi decreta Estado Emergência ba dala 9º.
