Pagina Inicial»Noticia
Parlamento Nacional liu hussi Sessão Plenária extraordinária, iha loron 3 fulan dezembro tinan 2020, autoriza Presidente da República, Francisco Guterres «Lu-Olo», hodi decreta Estado Emergência ba dala 8º hahú iha loron 4 fulan dezembro 00:00 horas too loron 2 fulan janeiro tinan 2021 23:59 horas.
Discussão ba renovação Estado Emergência ne’e hahú ho leitura guião no contínua kedas ba leitura ba mensagem hussi Presidente da República kona-ba renovação Estado Emergência refere.
Hussi mensagem ne’e, alem de ko’alia kona-ba rasão seluk atu Estado continua implementa Estado Emergência, ko’alia liu kona-ba numero caso infeção SARS-CoV-2 iha nação vizinho ne’ebé continua aumenta, liuliu iha República Indonésia ne’ebé regista caso liu 502.000 (rihun atus lima rua) no liu 16.000 (rihun sanulu-ressin-neen) mak mate hussi 34 província sira inclui Província vizinha Nusa Tenggara Timur (NTT).
Tanba ne’e importante tebes Estado Timor-Leste continua implementa Estado Emergência nune’e Governo bele controla no previne di’ak liu tan moras refere.
Entretanto medida sira contínua mantem hanessan Estado Emergência anterior ne’ebé sei concentra makas liu iha área fronteira sira liuliu fronteira terrestre.
Deputado sira contínua hussu ba Governo atu halo controlo máximo ba fronteira hodi previne movimento ilegal, no hussu Ministério Saúde atu continua socializa no halo prevenção ne’ebé máximo iha território tomak.
Liu hussi discussão naruk. Deputado sira liu hussi votação nominal ho 46 a favor, 0 contra no 3 abstenções. Nune’e autoriza Chefe Estado hodi decreta Estado Emergência ba dala 8º.
