Pagina Inicial»Noticia
Parlamento Nacional liu hussi Sessão Plenária Ordinária, iha loron 30 fulan novembro tinan 2020, hahú ona halo discussão iha generalidade ba Proposta de Lei nº 23/V (3ª) - Orçamento Geral Estado tinan 2021 nian. Proposta de Lei ne’e apresenta hussi Primeiro-Ministro da República Democrática de Timor-Leste, Taur Matan Ruak, acompanha hussi membro Governo sira.
Orçamento Geral Estado ba tinan 2021 ne’e Governo apresenta ho total USD 1.797,2 ne’ebé fahe ba categoria sira mak hanessan; Salários e Vencimentos $228,2 milhões; Bens e Serviços $397,3 milhões; Transferências Públicas $694,9 milhões; Capital Menor $58,8 milhões no Capital Desenvolvimento $417,7 milhões.
Sessão Plenária ne’e, hahú ho abertura hussi Presidente Parlamento Nacional, hafoin ida-ne’e, Secretária Mesa halo leitura ba guião discussão no votação Orçamento Geral Estado (OGE) nian, tuir kedas ho apresentação Primeiro-Ministro.
Iha apresentação Chefe Governo nian hatete ida-ne’e hanessan Orçamento Estado nian boot liu ne’ebé ita nia nação propõe atu bele hetan aprovação, ne’ebé desenvolvido atu fó resposta ba desafio sira ne’ebé mak antes ne’e nunca mossu, ne’ebé ita nia nação ne’e hassoru iha tinan 2020 nia laran. «Hau nia Governo formula orçamento ne’e atu revitaliza ita nia economia, protege no investe iha ita nia povo no fó ba ita-nia jovem sira oportunidade hodi integra iha sociedade nia leet atu realiza sira-nia mehi»
Além de ne’e, Chefe Governo mós afirma liu tan katak formato hussi orçamento tinan ida-ne’e nian muda maka’as, tanba adota ba dala uluk, abordagem orçamental ida ne’ebé baseia ba programa.
Ikus hussi apresentação, Chefe Governo declara katak Governo sei continua servi nia povo, implementa tia ona política sira ba estabilização nomos concorda atu implementa pacote recuperação económica ida hodi hahú hikas economia. Agenda ba tinan 2021 sei recupera di’ak liután no foca ba liu criação emprego ba ema hotu-hotu, ho investimento sira ne’ebé direcionado no sustentável atu hametin rendimento mediu família sira-nian, hodi hassae resiliência no gere crescimento equitativa”.
Hafoin de apresentação hussi Primeiro-Ministro, Comissão C ne’ebé trata Assunto Finanças Públicas halo apresentação ba relatório no parecer ba proposta de Lei Orçamento Geral do Estado 2021 nian. Sessão ida ne’e sei continua iha loron tuir mai terça-feira,01 fulan dezembro tinan 2020, continua ho discussão iha generalidade.
Sessão plenária ne’e, preside hussi Presidente Parlamento Nacional, Aniceto Longuinhos Guterres Lopes, acompanha hussi Membro da Mesa sira, conta mos ho presença Primeiro- Ministro da República Democrática de Timor-Leste, Taur Matan Ruak hamutuk ho membro Governo sira nomos conselheiro máximo Partido KHUNTO, José dos Santos Naimori Bucar.
